Jomart kenishindegi qaıǵyly oqıǵa: Ákimdik qaza bolǵandardyń otbasylaryna kómek kórsetedi

JEZQAZǴAN. KAZINFORM — Ulytaý oblysynyń ákimdigi ken ornynda qaza tapqan jumysshylardyń otbasylary men jaqyndaryna psıhologııalyq jáne áleýmettik turǵydan qajetti qoldaýdyń barlyǵyn kórsetedi. 

Qaıǵyly oqıǵaǵa baılanysty óńir basshysy Dastan Ryspekov kóńil aıtty

— Qaıǵyly oqıǵa barshamyzdyń júregimizge aýyr tıdi. Bul jaǵdaı — birneshe otbasy úshin orny tolmaıtyn qaza. Qaıtys bolǵan kenshilerdiń týǵan-týystaryna, jaqyndaryna shyn júrekten kóńil aıtamyn. Bul qasiret barshamyz úshin ońaıǵa soqqan joq. Qaza tapqandardyń otbasylaryna qajetti kómek kórsetý úshin barlyq tıisti shara qabyldanady, — delingen kóńil aıtý jedelhatynda.

Osyǵan deıin Ulytaý oblysyndaǵy shahtada apat bolyp, 7 adam tótenshe jaǵdaıda qalǵany týraly jazdyq.

Resmı derekke qaraǵanda, shahtada taý massasy qulaǵan.

Keıinirek «Jomart» kenishinde jetinshi jumysshynyń denesi tabyldy.

QR Tótenshe jaǵdaılar mınıstrligi baspasóz qyzmetiniń habarlaýynsha, qaıtys bolǵan jeti jumysshynyń denesi joǵaryǵa kóterilip, sot-medıtsınalyq saraptama júrgizý úshin polıtsııa qyzmetkerlerine tapsyryldy.

Memleket basshysy Ulytaý oblysynda kenshilerdiń qaza tabýyna baılanysty kóńil aıtty.