Jomart kenishindegi qaıǵyly oqıǵa: qaza tapqandardyń aty-jónderi jarııalandy
JEZQAZǴAN. KAZINFORM — Jomart kenishinde qaza tapqan jeti kenshiniń esimi belgili boldy, dep habarlaıdy Kazinform agenttiginiń tilshisi.
Jaqynda avarııalyq-qutqarý toptary qıraǵan taý-ken úıindileriniń astynan 7 kenshiniń denesin shyǵardy:
Qaza bolǵandardyń tizimi:
1. Aqshalov Qaırat Amanbekuly, 1975 jyly týǵan, sorǵy qondyrǵylarynyń mashınısi;
2. Jaqybaev Ardaq Boranbaıuly, 1998 jyly týǵan, jer asty ýchaskesiniń taý-ken sheberi;
3. Jumadýllaev Baqytbek Nyshanuly, 1975 jyly týǵan, jer asty taý-ken jumysshysy:
4. Kenjebekov Orynbek Ámirhanuly, 1991 jyly týǵan, tıeý-jetkizý mashınasynyń mashınısi;
5. Moldabekov Ǵalymjan Esenbekuly, 1978 jyly týǵan, shpýr burǵylaýshynyń kómekshisi,
6. Nurýldaev Oljas Jaǵalbaıuly, 1979 jyly týǵan, jer asty ýchaskesiniń energetıgi,
7. Rojkov Konstantın Vladımırovıch, 1992 jyly týǵan, jerasty taý-ken qazý jabdyqtarynyń elektr slesar-montajshysy.
Osyǵan deıin habarlanǵandaı, «Qazaqmys» qaza tapqandardyń otbasylaryna jumyskerdiń ortasha jyldyq jalaqysynyń 10 esesin, sondaı-aq jerleý rásimin uıymdastyrýǵa 2 mln teńgeden astam qarjy tóleıdi.
Osyǵan deıin Ulytaý oblysyndaǵy shahtada apat bolyp, 7 adam tótenshe jaǵdaıda qalǵany týraly jazdyq. Resmı derekke qaraǵanda, shahtada taý massasy qulaǵan.
Oqıǵaǵa baılanysty úkimettik komıssııa quryldy, ony Premer-Mınıstrdiń orynbasary Qanat Bozymbaev basqarady.
Ulytaý oblysy TJD jumyskerlerdiń tizimin jarııalady.
«Qazaqmys» korporatsııasynyń habarlaýynsha, aldyn ala málimetke sáıkes korporatsııa kenishterine tán emes tabıǵı gazdyń jarylysy bolǵan.
«Jomart» kenishinde kóz jumǵan jeti jumysshynyń da denesi tabyldy. Tótenshe jaǵdaılar mınıstrligi baspasóz qyzmetiniń habarlaýynsha, jumysshylardyń denesi joǵaryǵa kóterilip, sot-medıtsınalyq saraptama júrgizý úshin polıtsııa qyzmetkerlerine tapsyryldy.
Prezıdent Qasym-Jomart Toqaev «Qazaqmys» korporatsııasynyń Ulytaý oblysyndaǵy kenishinde taý massasynyń qulaýy saldarynan qaza bolǵan jumysshylardyń týǵan-týystary men jaqyndaryna kóńil aıtý jedelhatyn joldady.