«Jomart» kenishindegi apatty tergeýdiń aldyn ala qorytyndylary qaraldy

ASTANA. KAZINFORM — Memleket basshysynyń tapsyrmasy boıynsha Premer-mınıstrdiń orynbasary Qanat Bozymbaevtyń tóraǵalyǵymen ótken Úkimettik komıssııada «Qazaqmys korporatsııasy» JShS «Jomart» kenishindegi apatty tergeýdiń aldyn ala qorytyndylary qaraldy.

«Жомарт» кенішіндегі апатты тергеудің алдын ала қорытындылары
Фото: Үкімет

Tergeý aıasynda 8 kishi komıssııa qurylyp, ǵylymı-zertteý ınstıtýttary men zerthanalarynyń sarapshylary men mamandary da tartyldy.

Tergeý barysy týraly Tótenshe jaǵdaılar, Іshki ister, Eńbek jáne halyqty áleýmettik qorǵaý mınıstrligi ókilderiniń baıandamalary tyńdaldy. Atap aıtqanda, komıssııalar men kishi komıssııalardyń músheleri oqıǵany kózimen kórgen kýágerler arasynda saýalnama júrgizdi, óndiris tehnologııasyn zerttep, tehnıkalyq qurylǵylar men jabdyqtardyń jumysqa jaramdylyǵyn tekserdi, tıisti saraptamalar júrgizildi.

Komıssııa taý-ken qazbasynan metannyń jınalýy men bólinýi, sodan keıin elektr jabdyqtarynyń ushqynynan jarylys bolýy sııaqty apattyń negizgi sebebin anyqtady. Sondaı-aq ónerkásiptik qaýipsizdik pen eńbekti qorǵaý boıynsha aıtarlyqtaı ereje buzýshylyqtar anyqtalyp, jaýapty tulǵalar toby belgili boldy.

Jıynda Ulytaý oblysynyń ákimi Dastan Ryspekov pen «Qazaqmys korporatsııasy» JShS basqarma tóraǵasy Nurahmet Nurıev apatta qaza tapqandardyń otbasylaryna áleýmettik qoldaý men kómek kórsetý jáne ótemaqy tóleý boıynsha atqarylyp jatqan sharalar týraly baıandady.

Qazirgi ýaqytta «Jomart» kenishiniń jumysy toqtatyldy. Komıssııa qaýipti óndiristik obektilerde osyndaı oqıǵalardyń aldyn alý sharalaryn ázirledi.

Keńes qorytyndysy boıynsha komıssııa tóraǵasy Qanat Bozymbaev «Qazaqmys korporatsııasy» JShS-ǵa buzýshylyqtardy joıý men apattardyń aldyn alý boıynsha, onyń ishinde kenishtegi qaýipsizdikti arttyrý, aýadaǵy gaz quramyn anyqtaýdyń avtomattandyrylǵan júıelerin engizý, beınebaqylaý ornatý jáne basqa da birqatar tapsyrma berdi.

Tergeý jumystary jalǵasýda ári udaıy baqylaýda bolady.

Eske sala ketsek, 17 aqpanda Ulytaý oblysyndaǵy shahtada apat bolyp, 7 adam qaza tapqan bolatyn.

Сейчас читают