«Jomart» kenishindegi apat saldaryn joıý barysyn TJM tekserdi
JEZQAZǴAN. KAZINFORM - «Jomart» kenishinde apattyń saldaryn joıý jumystary jalǵasýda. Ónerkásiptik qaýipsizdik komıtetiniń tóraǵasy Rashıd Dýbaev pen «Qazaqmys korporatsııasy» JShS basqarma tóraǵasy Nurahmet Nýrıev atqarylyp jatqan sharalardyń barysyn tekserip, qaýipsizdik júıeleriniń jumysymen tanysty.
Tekserý kezinde RHINO qondyrǵysymen burǵylanǵan tehnıkalyq uńǵymalar kórsetildi. Aldymen dıametri 380 mm bolatyn bastapqy uńǵyma burǵylanyp, keıin ol 2,5 metrge deıin keńeıtiledi. Bul qubyrlar men kabelderdi júrgizýge ári jeldetýge múmkindik beredi. Sondaı-aq, gaz kontsentratsııasy shekti deńgeıden asqan jaǵdaıda elektr jabdyqtaryn avtomatty túrde sóndiretin statsıonarlyq datchıkter tanystyryldy.
Kenish atmosferasynda gaz bar-joǵy tekserilip, «Spýtnık-M1» gaz taldaǵyshy onyń mólsheri nól deńgeıinde ekenin kórsetti. Ár qyzmetkerge qol gaz taldaǵyshtary men geobelgi datchıkteri berilgen. Jumysshylar men tehnıkanyń qozǵalysy týraly málimet Ulytaý oblysynyń TJD men Ónerkásiptik qaýipsizdik komıtetine onlaın jetkiziledi.
Ǵ. Omarov atyndaǵy shahta uńǵymalaý tresinde arnaıy jeldetý ótkeli salyndy. Ol apat bolǵan aımaqtaǵy 37-shyǵys panelin tómengi transporttyq shtrekpen baılanystyrdy. Bul ótkel aldaǵy ýaqytta taza aýany jetkizý jáne sýdy sorý qubyryn ornatý úshin paıdalanylmaq.
Komıtet tóraǵasy atqarylǵan jumystarǵa oń baǵa berip, bekitilgen jospardy qatań oryndaýdyń qajettigin atap ótti. Qazirgi ýaqytta kenishte ǵylymı-zertteý jumystary jalǵasyp, jetekshi uıymdardyń qatysýymen monıtorıng pen baqylaý júıeleri engizilýde.
Eske salsaq, Ulytaý oblysyndaǵy «Jomart» kenishiniń jumysy qaıta iske qosylatyny týraly «Qazaqmys korporatsııasy» JShS-de málimdelgen bolatyn.