«Jomart» kenishinde qaza tapqan shahterler otbasyna qandaı kómek berildi

JEZQAZǴAN. KAZINFORM — Ulytaý oblysynyń ákimi Dastan Ryspekov «Jomart» kenishinde qaza tapqan jeti shahterdiń otbasyna kórsetilgen qoldaý sharalary týraly aıtyp berdi.

— Biz birden oqıǵa ornyna baryp, qaza tapqandardyń týystarymen kezdestik. 14 psıholog qajetti psıhologııalyq qoldaý kórsetti. Memlekettik járdemaqylardan bólek, korporatsııa tarapynan da qoldaý usynyldy. Ujymdyq kelisimshartqa sáıkes, árbir otbasyna 10 ese jyldyq jalaqy mólsherinde ótemaqy tóleý qarastyrylǵan, — dedi D. Ryspekov elordada Ortalyq kommýnıkatsııalar qyzmetinde. 

Oblys ákiminiń aıtýynsha, «Qazaqmys» korporatsııasy qaza tapqandardyń otbasylarynyń barlyq nesıelerin japqan jáne stýdentter bolsa, olardyń oqýyn tólep otyr. Sondaı-aq birqatar basqa da tólemder qarastyrylǵan.

— Oqıǵadan keıin bes aı ótken soń kenishte keıbir ýchaskelerden basqa jerlerde jumys qaıta jandandy. Onda eki aı boıy aýqymdy tekseris júrgizilip, birqatar nusqama berildi. Atap aıtqanda, ǵylymı-zertteý jumystary, jańa jabdyqty jetkizý men ornatý, sondaı-aq personaldy oqytý usynyldy, — dedi D. Ryspekov. 

Eske salaıyq, bıyl aqpan aıynda «Jomart» kenishinde taý massasy qulap, 7 shahter mert boldy.

Apattan keıin óndiriste qaýipsizdikti kúsheıtýge baǵyttalǵan jańa tehnologııalar engizilip jatyr.