Jomart Ertaevtyń kómekshisi Ýkraınadan ekstradıtsııalandy

ALMATY. QazAqparat - Búgin prokýratýra men ulttyq qaýipsizdik organynyń, jemqorlyqqa qarsy qyzmettiń ókilderi Jomart Ertaevtyń burynǵy kómekshisi Aıdos Qusaıynovty Ýkraınadan ekstradatsııalady dep habarlaıdy QazAqparat.

2011-2017 jyldar aralyǵynda qyzmettik jaǵdaıyn paıdalana otyryp, basqa tulǵalarmen aldyn ala kelisý arqyly «BANK RBK» AQ-nyń 144 mlrd teńgesin jymqyrdy dep aıyptalǵan Jomart Ertaevtyń kómekshisi de kóp mólsherde aqsha jymqyrdy degen kúdikke ilinip otyr.

Almaty qalasynyń prokýratýrasy Aıdos Qusaıynovtyń 2013-2018 jyldary Jomart Ertaevpen jáne ózge tulǵalarmen kelise otyryp 26,3 mln teńge jáne 1,7 mln AQSh dollaryn jymqyrǵanyn aıtady.

«Kúdiktiń áreketteri Qylmystyq kodekstiń 189 baby 4- bóliginiń 2-tarmaǵy boıynsha qaralatyn bolady. Buǵan deıin jazadan boı tasalaǵandyqtan, oǵan halyqaralyq izdeý jarııalanǵan bolatyn. Qazirgi tańda Aıdos Qusaıynov Almaty qalasynyń ýaqytsha qamaý ızolıatorynda otyr», - delingen resmı aqparatta.

Eske salsaq, Jomart Ertaevpen birge banktiń 41 top-menedjeri men jumysshysy kúdikke ilingen edi.