Jomart Ertaevqa aqsha jymqyrý isi boıynsha jańa úkim shyǵaryldy

ALMATY. QazAqparat – Almatyda «Bank RBK», «Qazaq Banki» jáne «Eurasian Bank» bankterinen 188 mıllıard teńgeden astam qarajatty jymqyrý isi boıynsha sot úkimi shyqty, dep habarlaıdy QazAqparat tilshisi.

Aıyptylardyń qatarynda eks-bankır Jomart Ertaev, astyq olıgarhy Nurlan Tileýbaev, Álimjan Tileýbaev, Aqan Sultanov, Serik Atabaı jáne Oksana Shestakova bar.

Qylmystyq istiń materıaldary negizinde Nurlan Tileýbaev Jomart Ertaevtyń kómegimen qamtamasyz etilmegen astyq qolhattary arqyly nesıe alǵan. Sonymen qatar, Ertaev Tileýbaevty ózi yqpal ete alatyn áriptesterimen tanystyrǵan. Al Tleýbaev bolsa, aqshanyń bir bóligin Ertaevqa aýdarýy kerek boldy.

Sot Jomart Ertaevty qylmystyq top qurǵany jáne alaıaqtyq jasaǵany úshin kináli dep tanyp, 9 jylǵa bas bostandyǵynan aıyrdy. Al Nurlan Tileýbaevty 10 jyl merzimge materıaldyq jaýapkershilikke baılanysty laýazymdardy atqarý quqyǵynan aıyra otyryp 9 jylǵa sottaldy. Ol jazasyn qaýipsizdigi ortasha kolonııada óteıtin boldy. Álimjan Tileýbaevqa iri kólemde alaıaqtyq jasady degen aıyp taǵyldy. Sot ony 5,5 jylǵa sottady. Para bopsalady dep aıyptalǵan Aqan Sultanov kináli dep tanyldy. Biraq, ol shaǵymdaný merziminiń aıaqtalýyna baılanysty jazadan bosatyldy. Asa iri kólemde alaıaqtyq jáne jalǵan qujattar jasaý, olardy satý boıynsha aıyptalǵan Oksana Shestakova men Serik Atabaıǵa bas bostandyǵynan aıyrý jazasy taǵaıyndaldy. Serik Atabaı - 5,5 jylǵa, al Shestakov 5 jylǵa sottaldy. Ekeýi de jazalaryn qaýipsizdigi ortasha kolonııada óteıtin bolady.

Sot Nurlan Tileýbaev, Álimjan Tileýbava, Jomart Ertaev, Serik Atabaı, Oksana Shestakovadan «DSFK (DSFK) Arnaıy Qarjy Kompanııasy» JShS-niń paıdasyna 97 mlrd teńgeden astam jáne memleketke 2 mlrd teńgeden astam baj salyǵyn óndirip alý týraly sheshim shyǵardy. Al 46 mlrd teńgeden astam jáne 1 mıllıard teńgeden astam memlekettik baj «Qazaq Banki» paıdasyna bolsa, 24 mlrd-tan astam teńge jáne 725 mıllıon teńge memlekettik baj salyǵy «Eýrazııalyq bank» AQ paıdasyna bolmaq.

Aıyptylarǵa azamattyq isti aıaqtaýǵa eki aı ýaqyt berildi.

Aıta ketý kerek, eks bankır Jomart Ertaev 2018 jyldyń mamyrynda Máskeýde ustalǵan bolatyn. Oǵan asa iri kólemde qarjy jymqyrdy degen aıyp taǵylǵan bolatyn.

Birneshe aıǵa sozylǵan sot protsesinen soń Jomart Ertaev Bank RBK tıesili 140 mlrd teńgeni jymqyrdy dep aıyptalyp, 11 jylǵa sottalǵan edi.