Jolymyz syn kótermeıdi – Aqtóbe oblysynyń ákimi
AQTÓBE. QazAqparat – Aqtóbede bıyl 600 shaqyrymnan astam jol jóndeledi. Bul týraly oblys ákimi esep berý kezdesýinde aıtty, dep habarlaıdy QazAqparat tilshisi.
«Turǵyndardy tasjol sapasy men qoǵamdyq máselesi alańdatady. Oblys joldarynyń 44 paıyzy nashar. El boıynsha, batys óńirleri arasynda Aqtóbe joldarynyń sapasy syn kótermeıdi. Ótken jyly 347 myń shaqyrym jol jóndeldi. Bıyl 636 shaqyrym jol qalpyna keltiriledi, jóndeý júrgiziledi. Aqtóbe qalasynyń Ońtústik aınalma joly, Selmash kópiri, Aqtóbe-Orsk avtojolynyń 8-16 shaqyrym aralyǵy, Oıyl – Qaraoı, Shalqar – Bozoı qalpyna keltiriledi. Qala kóshelerindegi joldyń jaǵdaıy jaqsy emes. Jeke ınvestorlardy tartý josparda bar», - dedi oblys ákimi Ońdasyn Orazalın.
Aıta keteıik, Aqtóbe – Atyraý tasjolynyń Aqtóbe – Qandyaǵash aralyǵy bıyl ashylady. Merdiger 90 shaqyrymdy bıyl qoldanysqa bermek.
«Aqtóbe qalasynyń qoǵamdyq kóliginde elektrondy bıletteýdi engizý boıynsha jumys júrgizilýde. «PATP» JShS-i «BPC Kazakhstan» JShS-men birlesip qolma-qol aqshasyz tólem jasaý jáne qalalyq kólikti tóleýdi esepke alýdy avtomattandyrý boıynsha jobany engizýde. Búgingi tańda statsıonarlyq valıdatorlar 90 avtobýsta ornatylǵan», - dedi Ońdasyn Orazalın.
