Joltaptyq aýylynyń turǵyndary 30 jyl jol azabyn tartyp keledi
«Bizdiń aýylǵa aparatyn 15 shaqyrym jolda qatty jabynnyń joqtyǵy máselesin sheshýde qoldaý suraımyz. Jol jaýyn-shashynnan keıin batpaqqa aınalady, jeńil mashına túgili, júk kóliginiń ózi óte almaıdy. Adamdar aınaladaǵy álemnen ajyrap qalǵan, aýdan ortalyǵyna medıtsınalyq beketke jetý múmkin emes», - dep muńdaryn jetkizdi aýyl turǵyndary bizdiń redaktsııaǵa.
Olardyń aıtýynsha, atalǵan másele 30 jyl boıy sheshilmeı keledi. Sonymen qatar, aýyl turǵyndary bılik ókilderi jol máselesin sheshý boıynsha buǵan deıin birneshe ret ýáde berilgenin, degenmen áli kúnge deıin joldyń joqtyǵyn aıtady.
«Pavlodar oblysynyń jergilikti ákimdiginiń áreketsizdiginen Joltaptyq aýylynyń 132 turǵyny nelikten zardap shegýi kerek?», - deıdi jergilikti turǵyndar.
Joltaptyq aýylynyń turǵyny Natalıa Drýzıktiń aıtýynsha, adamdar bul máseleni ártúrli deńgeıdegi ákimdermen kezdesý barysynda kótergen.
«Biz jol máselesin sheshýde qaıda júginý kerektigin bilmeımiz, sondyqtan problemany kóterip qoǵamdyq rezonans týdyrýǵa bel býdyq. Áleýmettik jeliler men aqparattyq qyzmetter arqyly ótinish joldandy. Osydan birer kún buryn aýdan máslıhatynyń hatshysy máseleni talqylap, onyń sheshý joldaryn qarastyrý maqsatynda bizge keldi», - deıdi jergilikti turǵyn QazAqparat tilshisimen áńgime barysynda.
Aýdan máslıhatynyń ókili málim etkendeı, Joltaptyq aýyly negizgi tasjoldan 15 shaqyrym alshaq ornalasqandyqtan, jol salý jergilikti bıýdjet úshin tym qymbat jáne bul maqsatqa qarajat bólinbeıdi.
«Eń ońtaıly sheshim, «Myńkól-Joltaptyq» tasjolyn (uzyndyǵy 5 shaqyrym kirmejol) aýdan ákimdiginiń balansyna engizý, jobalaý-smetalyq qujattamany ázirlep, sodan keıin qıyrshyq tas tóseýge qarajat bólý», - dep tolyqtyrdy N. Drýzık.
Onyń sózinshe, aýdan máslıhatynyń hatshysy 15 shaqyrym joldy retke keltirý máselesi nazardan tys qalmaıtynyn aıtqan. Biraq turǵyndar eń bolmaǵanda 5 shaqyrymdy jóndeýge de kelisip otyr.
«Aýdan máslıhatynyń depýtattary T. M. Dáýletov, T. S. Sársenov jáne R. J. Ibraev 2 mamyrda halyqpen kezdesý ótkizý úshin Joltaptyq aýylyna bardy. Kezdesý barysynda jol jaǵdaıyna qatysty túsinikteme berildi. «Joltaptyq – Myńkól» kentter arasyndaǵy balamaly joldy Aqtaý aýyldyq okrýgi ákimi apparatynyń balansyna qabyldaý máselesi qaraldy. Balansqa jaýapkershilik bekitilgennen keıin qatty jabyndy tóseý arqyly joldy ortasha jóndeý boıynsha jobalaý-smetalyq qujattama daıyndalady», - dep túsindirdi Jelezın aýdany ákiminiń mindetin atqarýshy Rashıd Kókishev QazAqparat redaktsııasynyń ótinishinen keıin.
