Jolshylar 650 avtokólikti qar qursaýynan shyǵaryp, 800-ge jýyq adamdy evakýatsııalady

ASTANA. KAZINFORM – Bıyl qys qaharany minip tur. Qys bastalǵaly jolshylar 650 avtokólikti qar qursaýynan shyǵaryp, 800-ge jýyq adamdy evakýatsııalaǵan. Bul týraly KazAvtoJol málim etti. 

Elimizdiń barlyq aımaǵynda, ásirese ońtústik oblystarda qalyń qar jaýyp, boran soǵýda. Aıtalyq, Jambyl oblysynda ótken jyldyń sáıkes kezeńimen salystyrǵanda jaýyn-shashyn qalypty mólsherden eki esege kóp túsken. Ádette, qalyń jaýǵan qardyń sońy daýyldy jelge ulasady. 

Al, tabıǵattyń bul tosyn minezi avtojoldarda shekteýli kórinis jáne tótenshe jaǵdaılarǵa ákeletini belgili. Jolshylar respýblıkalyq mańyzy bar avtojoldardy paıdalanýshylarǵa barynsha kómek qolyn sozyp otyr. 

Qys bastalǵannan beri «QazAvtoJol» UK» AQ qyzmetkerleri 650-den astam kólikti qar qursaýynan shyǵaryp, 800-ge jýyq adamdy evakýatsııalady. Atap aıtqanda, aýa raıynyń qolaısyzdyǵyna baılanysty jolda qalǵan júrgizýshiler men jolaýshylardy jol boıyndaǵy jylý pýnktterine jetkizdi. Olar ystyq tamaq, sýsyn jáne janar-jaǵarmaı materıaldarymen qamtamasyz etildi. Odan bólek, qajettilikke baılanysty jolda synyp qalǵan keıbir kólikterdi jol jóndeý ýchaskeleriniń jyly garajdaryna súırep aparyp, avtokólikterdi qalpyna keltirýge kómek kórsetti.