Jolserikterdiń rezonansty qylmysy júıedegi problemany syrtqa shyǵardy – Murat Ábenov

NUR-SULTAN. QazAqparat – Temirjol salasyndaǵy problema bılet tapshylyǵymen shektelmeıdi. Qoǵam qaıratkeri, arnaıy monıtorıng tobynyń múshesi Murat Ábenov avtomobıl joldary men kóliktik baqylaý salasyndaǵy sybaılas jemqorlyqqa qarsy kúres máselesine arnalǵan keńeste osylaı dep málim etti.

Murat Ábenov el arasynda jol sapasy men «Sergek» júıesiniń jumysyna qatysty kóptegen shaǵym bar ekenin aıta kele, temirjol salasynda qordalanǵan máselelerge toqtaldy.

«Bılet tapshylyǵymen temirjol salasyndaǵy problemalar shektelmeıdi. Jolserikterdiń adam zorlaý boıynsha sottalýy salada júıeli problemalar bar ekenin kórsetip otyr. Keshegi rezonansty oqıǵadan keıin buryn da ondaı qylmystar ashylmaı qalǵan shyǵar degen kúdik týady. Bul oqıǵa jolserik jumys ornynda ishimdik iship, kimdi qaı jerge otyrǵyzǵysy kelse ózi biledi degen oı qalyptastyrady», - degen qoǵam belsendisi bılet saýdasyna qatysty alypsatarlyqtyń aldyn alýda kórshi elderdiń qandaı sharalarǵa barǵanyn mysalǵa keltirdi.

«Mysaly Ózbekstanda perronǵa bıleti bar jolaýshydan basqa adamdardy ótkizbeıdi. Osy sııaqty qarapaıym tásilderdi bizge qoldaný kerek. Bılet saýdasyn baqylaý jolaýshylardyń qaýipsizdigimen tikeleı baılanysty», - dedi ol.

Sondaı-aq, Murat Ábenov bıletti alyp satýmen aınalysatyn adamdardy quqyq qorǵaý organdarynyń naqty jaýapqa tarta almaı otyrǵanyn synǵa aldy. Prokýratýra ókilderiniń bılet alyp satqyshtardy jolaýshylardyń mazasyn alǵany úshin ǵana jaýapqa tarta alatyny meni tańǵaldyrdy. Prokýratýra bulaı qaýqarsyzdyq tanytsa, qalǵan organdar týraly aıtýdyń ózi artyq shyǵar. Barlyǵynyń aıtatyny bir ýáj – bıletti satyp alýshynyń zań buzǵanyn dáleldeý múmkin emes. Prezıdenttiń ózi bul máseleni qatań tapsyryp otyr. Sondyqtan zańnamalyq negizde máseleniń túıinin tabý qajet», - dedi qoǵam qaıratkeri.