Jolserikter bıletsiz jolaýshyny Qyzylordadan Shymkentke 5 myń teńgege jetkizedi
Bul jaǵdaılar bılet máselesine baılanysty jaǵdaıdy zertteý jáne jolserikter qyzmetinde sybaılas jemqorlyq faktilerin jan-jaqty saralaýdy maqsat etken arnaıy monıtorıng barysynda anyqtaldy. Atalmysh monıtorıngke QR memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń mamandary da qatysty. «Jasyryn satyp alýshy» tásili boıynsha temir jol vokzalynda monıtorıng júrgizilip, mamandar birqatar jaǵdaılarǵa kóz jetkizdi.
Astana qalasyna deıin qatynaıtyn «Talgo» poıyzyna (090T) «Qazaqstan temir joly UK» AQ belgilegen resmı baǵa - 29 777 teńge. «Deldaldar» zańsyz áreket jasap, jolaýshyǵa elordaǵa deıin 20 myń teńgege barýǵa bolatynyn jetkizedi. Sondaı-aq, «deldaldyq» jasaǵandar 056H nómirli «Qyzylorda-Kókshetaý» poıyzymen Astanaǵa 15 myń teńgemen barýǵa bolatynyn aıtqan.
«Poıyzǵa bıletsiz otyrǵyzýdy kásip etken azamattar poıyzdardyń kez kelgen jolserigimen kelisip, ózderine júgingen ár adamdy jeter jerine deıin jetkizýge kepildik bere alady. «Deldaldar» vokzalǵa kelip toqtaıtyn jolaýshylar poıyzynyń brıgadırlerimen baı lanysy bar ekenin aıtyp, solar belgilegen vagondarǵa jaıǵastyryp beremiz degen», - deıdi QR memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń baspasóz hatshysy Baǵdat Ábdiqadyrov.
Arnaıy monıtorıng kezinde top músheleri jolseriktermen de tikeleı sóılesip kórdi. Sol kezde «Aqtóbe-Almaty» poıyzynyń jolserikteri Shymkent qalasyna bir adamdy jetkizý úshin 3500-5000 teńge suraǵan. Vagonda oryn bolmaı qalǵan jaǵdaıda jolserikter óz ornyn beretinin aıtty.
«Bul bir rettik shara emes. Aldaǵy ýaqytta da jalǵasyn tabady. Osy baǵyttaǵy jumystar turaqty túrde júrgiziledi»,- dedi arnaıy monıtorıng tobynyń jetekshisi Anar Іzden.