Jolǵa shyqqanda qandaı dári-dármekti ala júrý kerek
ASTANA. QazAqparat - Meıli shetelge bolsyn, meıli el ishindegi demalys bazalaryna shyǵar aldynda árbir otbasy jol sómkesine dári qobdıshasyn alyp júrýi kerek. Ol qobdıshada eń kem degende bes preparat bolýy tıis. Bilikti pedıatr osyndaı keńes aıtady, dep habarlaıdy QazAqparat tilshisi.
Jyldar balalardyń densaýlyǵyn jiti baqylap júrgen maman retinde, óz balalarynyń anasy retinde qalalyq №8 emhananyń pedıatry Záýre Ahmetjanova aýyryp em izdegenshe, aýyrmaýdyń jolyn izdeý kerektigin aıtady. Sondyqtan, eń aldymen mamannyń bergen keńesi - kez kelgen aýrýdyń aldyn alý.
Bul degenińiz - balańyzdyń árdaıym - basseınnen keıin nemese jaǵadan kelgen kezde, qydyryp oralǵan ýaqytta, eń bastysy tamaq aldynda beti-qolyn jýǵanyna kóz jetkizýińiz kerek. Aıtpaqshy, balanyń kúndelikti tutynatyn taǵamyna syrtta júrgen kezde basqa tamaqtardyń aralastyrýǵa asyqpaǵan abzal. Bul kezde aǵzanyń reaktsııasy demalysyńyzdy áýrege aınaldyrýy ábden múmkin.
«Sýsynǵa kelgen kezde de buryn ishpegenderin berýge bolmaıdy. Álbette, bótelkedegi ǵana sýdy tutynǵany durys», - degen pedıatr úıden shyqqan kezde otbasynyń barlyq múshesi basyna jazǵy bas kıimdi kıip shyǵýy kerektigin eskertedi.
Osy jaıdy sóz ete kele maman demalysqa shyqqan kezde alyp júrýińiz tıis dári-dármekterdiń túrin atady. Eń aldymen - ystyqty túsiretin dáriler kerek. Qazaqstandyq dárigerler bul rette kóbinese paratsetamoldy qoldanady. Alaıda ǵylymı dáleldi bazaǵa sáıkes, paratsetamoldy Densaýlyq saqtaý mınıstrliginiń hattamasy boıynsha qoldanýǵa keńes beriledi. Ystyqty túsiretin ıbýfen de bar. Biraq, atalǵan eki dári bolmasa da, ystyq túsiretin preparattardy ózińizben birge alyp júrgen jón.
Ekinshi - probıotıkter. Jańa orynǵa barsańyz, álbette ol jaqtyń taǵamy da, sýy da, tipti aýasy da bólek bolady. Jańa taǵamdarǵa kelgende ishekterińiz aýyryp qalýy múmkin bolǵandyqtan, probıotıkterdi alyp júrý kerek.
Úshinshiden, - allergııaǵa qarsy dári-dármekter. Barǵan jerińizde kún ystyq bolsa nemese ómiri kórmegen jándikterdi shaǵyp alsa, allergııany elemeı júre almaısyz.
Tórtinshi - ýlanyp qalý qaýpi bolatyndyqtan, belsendirilgen kómirdi de alyp júrý qajet. Qara tabletkalardy balalardyń bári de tutynýǵa qarsy bolar. Bálkim, olarǵa qara dáriden góri «polısorb» atty dári saı kelýi múmkin. Preparat ári arzan, ári aǵzaǵa enip ketken toksınderdi ońaı shyǵarady.
Besinshisi - tynyshtandyratyn dárilerdi de alyp júrińiz. Máselen, sizdi barǵan jerińizde jándik shaǵyp alatyn bolsa, deneńiz qyshyp mazańyz ketýi yqtımal. Osy sebepti ózińizben birge maı nemese geldi alyp júrińiz.
Sonymen birge, pedıatr jolǵa shyqqanda ıod, bınt, jabystyrǵysh ta kerek bolýy múmkin ekenin eskertedi.
