Jolǵa aǵash ekken bir saýap...
ASTANA. 21 qyrkúıek. QazAqparat - Búgin Astanada «Biz taza qala úshin» sanıtarlyq tazartý, kógaldandyrý jáne abattandyrý boıynsha dástúrli jalpy qalalyq senbilik ótip jatyr. Ol 10 qyrkúıek-10 qazan aralyǵynda ótetin ekologııalyq aılyq aıasynda uıymdastyryldy.
Іs-sharaǵa Astana qalasynyń ákimi Imanǵalı Tasmaǵambetov, memlekettik organ ókilderi, depýtattar, muǵalimder, medıtsına qyzmetkerleri, mektep oqýshylary, stýdentter men qala turǵyndary qatysýda.
Jalpy qalalyq ekologııalyq senbilik aıasynda qalalyq jáne respýblıkalyq uıymdar «Astana-Zelenstroı» AQ birlesip 4 myńnan astam kóshet otyrǵyzady.
Almaty aýdanynda Aqjol jáne №14 kóshelerdiń qıylysynda qaý japyraqty shegirshin, súmbil terek, qyzyl tal, úıeńki men jıde aǵashynyń 1848 kósheti otyrǵyzylmaq.
Saryarqa aýdanynda Tilendıev dańǵyly boıynsha Prıdorojnyı kóshesinen bastap soltústik-batys aınalma jolyna deıin jáne Saryarqa-Abaı kósheleriniń qıylysyndaǵy saıabaqta 646 aǵash otyrǵyzý kózdelgen. Munda terek, úıeńki, qaraǵaı, balqaraǵaı otyrǵyzylady.
Esil aýdanynda 1545 kóshet otyrǵyzylmaq: Turan dańǵyly №31 kósheden «Astana juldyzy» monýmentine deıin usaq japyraqty shegirshin, al Botanıkalyq baq aýdanyna qaraǵaı, arsha, qaıyń, sheten jáne zerek aǵashtary otyrǵyzylady.
Jalpy qalalyq senbilik aıasynda alýan túrli aǵashtan 4039 túp otyrǵyzý josparlanǵan.
Sonymen qatar, jınalǵan qoqysty tıeý boıynsha júk tıegish tehnıka men brıgada usynyldy. Qala basshysynyń tapsyrma-josparyna sáıkes, Energetıka, kólik jáne qurylys basqarmasynan lastanǵan jerlerdi tazalaý jáne ony polıgonǵa ýaqytyly kómý úshin 30 júk tıeýish jáne 90 úlken júk tasymaldaıtyn mashına bólinedi. Budan basqa, kommýnaldyq, qurylys jáne qaladaǵy basqa da kásiporyndardyń mehanızatsııalanǵan tehnıkasy tolyq tartylady.
Senbilik pen ekologııalyq aılyqty ótkizýdi qalany kórkeıtý, kógaldandyrý jáne sanıtarlyq tazartý, abattandyrý boıynsha jumystardy júrgizýdi baqylaıtyn jáne tikeleı jaýapty shahar basshysy bekitken qalalyq shtab, aýdan ákimdikteri, qalalyq departamentter men basqarmalardyń basshylary qamtamasyz etedi.
