Joldyń qarsy jolaǵyna shyqqan kólik ıesi júrgizýshi kýáliginen aıyrylady
ASTANA. 30 qyrkúıek. QazAqparat - Endi joldyń qarsy jolaǵyna shyqqan kólik ıeleri júrgizýshilik kýálikterinen aıyrylady.
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Іshki ister mınıstriniń orynbasary Erlan Turǵumbaev málim etti.
«Qazirgi kezde Qazaqstannyń Іshki ister mınıstrligi zańnamalyq aktilerge birqatar ózgerister engizdi, sondaı-aq «Jol qozǵalysy týraly» jańa zań jobasy ázirlendi. Bul qujattyń jobasynda jol júrý erejesin buzǵany úshin avtokólik ıesi men jaıaý júrginshilerdiń jaýapkershiligi kúsheıtildi. Eger de buryndary joldyń qarsy jolaǵyna shyqqany úshin aıyppul salynsa, endi kólik ıesi erejeniń osy bóligin úsh retten astam buzsa, onda ol júrgizýshi kýáliginen alty aıǵa deıin aıyrylýy múmkin»,-dedi vıtse-mınıstr.
Belgili bolǵandaı, bıylǵy 8 aıda jol polıtsııasy 1 mln. 339 myń quqyq buzýshylyqtyń jolyn kesti. Kólikti mas kúıinde basqarǵan 32 myń júrgizýshi quryqtaldy. Sonymen qatar jol júrý erejesin óreskel buzǵan 90 myń jaıaý júrginshige aıyppul salyndy.
