Joldy qysqartpaq bolǵan: Jaıyq ózeninde muz astyna áıel túsip ketti
«Keshki saǵat 21:49-da Atyraý qalasyndaǵy «Elıta» meıramhanasynyń tusynda belgisiz adam Jaıyq ózenine batyp bara jatqany týraly shaqyrtý tústi. Shaqyrtý ornyna jetken jedel qutqarý jasaǵynyń qutqarýshylary men jedel kezekshi sýǵa batqan áıeldi qutqaryp qaldy. Ol joldy qysqartý úshin ózenniń kelesi jaǵalaýyna muz ústimen ótpek bolǵan. Qutqarylǵan áıelge alǵashqy medıtsınalyq kómek kórsetilip, oblystyq aýrýhanaǵa jetkizildi. Qazir 1979 jyly týǵan áıel aýrýhana dárigerleriniń baqylaýyna alyndy», -dep habarlady Atyraý oblystyq Tótenshe jaǵdaılar departamentiniń qoǵammen baılanys tobynan.
Jaıyq ózenine batqan áıeldi qutqarýǵa departamenttiń 5 qyzmetkeri men 2 tehnıka jumyldyryldy.
«Bir kúnde Jaıyq ózenine eki adamnyń batqany tirkeldi. Osyǵan baılanysty turǵyndardan juqa muz ústimen ótpeýdi eskertemiz. Óıtkeni, aýa raıynyń jylynýyna baılanysty Jaıyq ózenindegi muz erip jatyr», - delingen habarlamada.
Buǵan deıin Atyraýda Jaıyq ózeniniń muzy jarylyp, sýǵa batqan er adam qutqarylǵanyn jazǵan bolatynbyz. Ony balyq aýlap otyrǵan 2 adam kórip, qutqarýǵa umtylǵan. Olar sýǵa batqan adamdy qoldan jasaǵan qaıyqqa otyrǵyzǵanmen, ózderi muz ortasynda qalyp qoıǵan. Qutqarýshylar úsh adamdy qutqarý úshin qaıyqty arqanmen tartyp, jaǵaǵa shyǵarǵan.
