Joldaýǵa sáıkes bilim berý júıesi de jańartylady - Sholpan Qadyrova

«Memleket basshysy bıylǵy Joldaýynda elimizdegi bilim berý júıesiniń qazirgi zamanaýı kóshke ilesýi úshin úlken mindetter qoıyp otyr, - dedi Sholpan Maratqyzy.

«Júrgizilip jatqan halyqaralyq zertteýler de búginde bilim berý júıesin ońtaılandyrýǵa baǵyttalýda. Óıtkeni álem ózgerýdi, ózgeristerdi qajet etetini belgili. Biz qazir ulan-asyr jańa múmkindikterdi ashyp qana qoımaı, búkil bilim berý júıesin jańarýǵa, jańǵyrýǵa shaqyratyn úzdiksiz tehnologııalyq damýdy bastan ótkerip otyrmyz. Endeshe, bizge ekonomıkalyq jáne qoǵamdyq jańarý qajettilikterine saı keletin osy zamanǵy bilim berý júıesi qajet.  

Aıtalyq, oqýshylardyń qosymsha bilim berý ortalyqtarynda alǵan daǵdylar men iskerlikterin ary qaraı damytý baǵytynda 2016 jyly Oralda Oqýshylar men jastar saraıy ashylǵan bolatyn. Mine, osynda ornalasqan oblystyq balalar tehnıkalyq shyǵarmashylyǵy ortalyǵynda jańa kompıýter synyby ashylyp, jańadan kompıýterler men robottar, EV-3 qurylǵysy satyp alynýda. Kompıýtermen jumys jasaıtyn «Grafıkalyq dızaın» úıirmesi, balalardyń ınjenerlik-tehnıkalyq tapsyrmalardy sheshýge praktıkalyq daǵdysyn damytý baǵytynda robot tehnıka úıirmesi jumys jasaıdy. «Jas astronom» úıirmesi oqýshylardy ǵylymı-zertteý salasyna jáne óndiristik-tehnologııalyq ortaǵa utymdy túrde úıretedi. Zamanaýı tehnıkalyq quraldarmen jabdyqtalǵan astronomııa úıirmesi sabaqtary jańadan ashylǵan planetarıı, observatorııa kabınetterinde ótedi.

Elbasy Nursultan Nazarbaevtyń Joldaýyna sáıkes 2018 jyldyń 1 qańtarynan bastap bilim berýdiń jańartylǵan mazmunyna kóshken ustazdardyń laýazymdyq jalaqysyn kóbeıtý kútilýde. Bul - 1,2,5,7 synyp muǵalimderi. Laýazymdyq jalaqyǵa jańartylǵan mazmun boıynsha jumysy úshin muǵalimniń laýazymdyq jalaqysynan 30 paıyz kóleminde qosymsha aqy tólenedi. Jańartylǵan bilim mazmunyna kóshken soń 3,6,8 synyptar ustazdarynyń jalaqysy 1 qyrkúıekten bastap ósedi. Bul bilim salasynyń qyzmetkerlerin qýantýmen birge úlken jaýapkershilik júkteıdi,-dedi bilim basqarmasynyń basshysy. 

-Sholpan Maratqyzy, Nazarbaev zııatkerlik mektepteriniń is-tájirıbesin oblys mektepterine engizý baǵytynda nendeı jumystar júrgizilýde?

2017 jyldyń 22 qarashasynda «Nazarbaev zııatkerlik mektepteri» derbes bilim berý uıymy men Batys Qazaqstan oblysy ákimdigi arasyndaǵy ózara árekettestik týraly memorandýmǵa qol qoıylyp, is-sharalar jospary bekitildi.

2016 jyldyń 1 qyrkúıeginen bastap elimizdiń barlyq mektebinde Nazarbaev zııatkerlik mektebiniń tájirıbesi negizinde bilim berýdiń jańa baǵdarlamasy engizildi.

2017-2018 oqý jylynda jańartylǵan bilim berý mazmunyna 2,5,7 synyptar kóship (1-synyptarda - 11263, 2-synyptarda - 11255, 5-synyptarda - 9618, 7-synyptarda - 8677, jalpy 40813 oqýshy), bilim alýda.

NZM tájirıbesin taratý boıynsha bazalyq mektep bolyp belgilengen daryndy balalarǵa arnalǵan mamandandyrylǵan S.Seıfýllın atyndaǵy №11 oblystyq mektep-ınternaty kesheni men Oral qalasyndaǵy A.Makarenko atyndaǵy mektep bul jumysty 2012 jyldan beri jalǵastyryp keledi.

BQO bilim basqarmasy men «Nazarbaev zııatkerlik mektebi» DBBU Oral qalasyndaǵy fızıka-matematıkalyq baǵyttaǵy fılıalymen tájirıbe almasý aıasyndaǵy ózara árekettestigi boıynsha is-sharalar josparyna sáıkes 2014 jyldan beri naqty jumystar atqarylýda.

NZM pedagogteri únemi oblystaǵy bilim sapasyn jaqsartý maqsatynda qurylǵan «Pıfagor» fızıka-matematıka mektebi (oqýshylarǵa arnalǵan maýsymdyq mektep), «Zerde», «Lıngvıst», «Órken» ozat tájirıbe mektebi (jaratylystaný-matematıka, fılologııalyq pánder, tarıh páni muǵalimderi úshin) jumystaryna tartylyp, tájirıbe almasyp keledi.

Qazirgi tańda jańartylǵan bilim berý mazmuny boıynsha 4984 pedagog bilimin jetildirse, sonyń 1244-i Oral qalasyndaǵy «Nazarbaev zııatkerlik mektepteri» DBBU pedagogıkalyq sheberlik ortalyǵynda, 3740-y «Órleý» BAUO» AQ fılıaly Batys Qazaqstan oblysy boıynsha pedagogıkalyq qyzmetkerlerdiń biliktiligin arttyrý ınstıtýtynda dáris aldy. Sondaı-aq jańartylǵan bilim berý mazmuny boıynsha 881 basshy qyzmetker bilimin jetildirdi.

-Taǵy bir saýal, «Rýhanı jańǵyrý» baǵdarlamasy aıasynda qandaı jobalar qolǵa alynýda?

Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasynyń basty maqsaty rýhanı sanany jańǵyrtý ekendigi málim. Bul baǵyttaǵy jumystar bilim berý salasynda «Týǵan jer» baǵdarlamasynyń «Tárbıe jáne bilim» kishi baǵdarlamasy aıasynda júzege asyrylýda.

Naqty nátıjelerge qol jetkizý úshin «Ólketaný» bazalyq baǵyty boıynsha bilim alýshylardyń oqý pánderi men sabaqtan tys fakýltatıvti sabaqtar, úıirmelik jumys arqyly ólketaný bilimi jan-jaqty beriletin bolady. «Sanaly azamat» bazalyq jobasy arqyly oqýshylardyń damý bolashaǵy men eńbek naryǵy múmkindikterin, qabilet-talaptaryn eskere otyryp, olardy baǵdarly qoldaý, qyzmet aıasyn tańdaý erkindigine, ózin-ózi kásibı anyqtaýǵa jol ashylady. Kishi baǵdarlamanyń «Otanym - taǵdyrym» bazalyq baǵytynda jastardyń boıynda azamattyqty, patrıottyqty, rýhanı-adamgershilik jáne áleýmettik qundylyqtaryn qalyptastyrý, kásibı mańyzdy qasıetterdi jáne daǵdylaryn damytýǵa mol múmkindik berilgen.

2018 jyly «Týǵan ólkeniń kórnekti jerlerinen Qazaqstannyń kıeli jerlerine deıin» týrıstik-ekskýrsııalyq marafony, jas tarıhshylar arasynda «Meniń kishi Otanym» zııatkerlik baıqaýy, jas sýretshiler arasynda «Boıaýlar qupııasy» oblystyq baıqaýy, «Týǵan jerdi jyrlaıdy» oblystyq jas aqyndar saıysy, «Teatrdyń ǵajaıyp álemi» teatr óneriniń festıval-baıqaýy, «Tarıh murasy», «Business», «Balalar-jasóspirimder jáne eriktiler qozǵalysy», «28 ilmek» jobalaryn ótkizý josparlanýda.

Osyndaı sharalar nátıjesinde úzdik jobalar jınaqtary jáne oblystyń árbir eldi mekeni boıynsha 3D kartasy, býktreılerler ázirlenetin bolady.