Joldaýdyń qazan aıynda jarııalanýynyń ózindik máni bar - Sanat Kóshkinbaev

ASTANA. QazAqparat - Joldaýdyń qazan aıynda jarııalanýynyń ózindik mańyzy bar. Sebebi, qarasha aıynda kelesi jyldyń bıýdjeti qattala bastaıtyndyqtan, Úkimet te naqty qaı salaǵa qandaı qarajat jumsaý kerektigin biletin bolady. Prezıdent Nursultan Nazarbaevtyń Joldaýy týraly mundaı pikirdi QR Prezıdenti janyndaǵy Strategııalyq zertteýler ınstıtýty dırektorynyń orynbasary, saıasattaný ǵylymynyń doktory Sanat Kóshkinbaev aıtty, dep habarlaıdy QazAqparat tilshisi.

«Memleket basshysy Nursultan Nazarbaevtyń bıylǵy Joldaýy álbette, formaty men mazmuny jaǵynan burynǵylardan erekshe. Joldaýda naqty mindetter men maqsattar belgilendi. ıAǵnı, eń aldymen qujatta adam men onyń múddesine tór berilgen. Demek, Joldaý bárinen buryn qarapaıym azamattardyń múddesin kózdeıdi. Atap aıtqanda, qujatta basty talap retinde aılyqtyń ósýine, halyqtyń tabysyna mańyz berildi. Biz eń tómengi jalaqynyń bir jarym esege artatynyn naqty bilip otyrmyz. Túptep kelgende, bul Joldaýda qarapaıym azamattardyń jaǵdaıyn jaqsartý jaıy qarastyrylǵan», - dedi sarapshy.

Sanat Kóshkinbaevtyń aıtýyna qaraǵanda, Joldaýdaǵy maqsattar men mindetterdi oryndaý úshin qansha qarajat (1,5 trıllıon teńge) jumsalatyny naqty aıqyndalǵan.

«Bir aıta keterligi, nelikten Joldaýda naqty qazan aıynda osy másele kóterilip otyr. Sebebi, ózderińiz biletindeı, qarasha aıynda kelesi jyldyń bıýdjeti qattala bastaıdy. ıAǵnı, bıýdjetti sala-salaǵa bólgen kezde Parlament te, Úkimet te qansha qarajatty qaı baǵytqa jumsaıtynyn anyq biletin bolady. Mine, sondyqtan Joldaýdyń ýaqyty da teginnen tegin tańdalyp otyrǵan joq», - deıdi ol.

Sarapshy, sonymen qatar, bıylǵy Joldaý «Bes áleýmettik bastama» baǵdarlamasymen etene baılanysyp, qarjylyq esep jiti eseptelip otyrǵanyn tilge tıek etti.

«Úkimetke naqty qandaı tapsyrmalardyń berilgeni taıǵa tańba basqandaı bekitildi. Buryn Joldaýdy Memleket basshysy Parlament qabyrǵasynda joldasa, bıyl Aqordada ótti. Ol jerde el bıligindegi barlyq azamattar boldy. Demek, memlekettik apparattardyń barlyǵynyń aldyna naqty mindetter qoıyldy. Eń bastysy - talap bar. Azamattardyń jaǵdaıyn jaqsartý tapsyrmasy qalaı oryndalady? Menińshe, Joldaýda kórsetilgen mindetter naqty oryndalsa, 2019 jyly nátıje birden kórinedi», - dedi Sanat Kóshkinbaev.