Joldaýdy tıimdi júzege asyrýda passıonarıı jastar kerek - Danııar Manarbekuly

ASTANA. QazAqparat - QR Tuńǵysh Prezıdenti - Elbasy kitaphanasynda mektep oqýshylary men stýdentterge arnalǵan tanymdyq semınar-trenıngter tsıkly jalǵasyp jatyr. «Rýhanı jańǵyrý: bolashaqqa baǵdar» baǵdarlamalyq maqalasy aıasynda ótip jatqan sharanyń kezekti spıkeri - «Nur Otan» partııasy «Jas Otan» jastar qanatynyń tóraǵasy Danııar Manarbekuly. Danııar myrza «Passıonarıı bolý degenimiz...» taqyrybynda Qostanaı jáne Qaraǵandy oblysy jastary aldynda sóz sóılep, memleket basshysy joldaýynyń mańyzdy tustaryna toqtaldy.

- Semınar-trenıng aıasynda Siz Elbasynyń búgingi «Qazaqstandyqtardyń ál aýqatynyń ósýi: tabys pen turmys sapasyn arttyrý» Joldaýynyń  mańyzy týrasynda da egjeı-tegjeıli aıtyp óttińiz...

- Iá, ózara dıalog formatynda ótken bul Joldaýda keler jyldyń «Jastar jyly» bolyp belgilenýi jas býynnyń ókili retinde qýana qabyldaǵan jańalyǵym boldy. Jastar máselesi degende álbette eki problemanyń basy qyltııady: jumys pen baspana. Munyń ekeýi de áleýmettik máseleler.  Bul turǵyda, Elbasy Joldaýynyń basym bóligi áleýmettik baǵytta bolǵany quptarlyq. Osy oraıda, eń tómengi jalaqynyń kóterilýi men «7-25-20» baǵdarlamasyndaǵy alǵashqy jarnany tómendetýdi qarastyrýdy tapsyrǵany da jastarǵa kómek bolary sózsiz. Buǵan qosa, bızneske salyqtyq raqymshylyq jasaý men «Bıznestiń jol kartasy» baǵdarlamasynyń 2025 jylǵa deıin uzartylýy da jastardy kásipkerlikke kóptep tartyp, yntalandyrýǵa zor kómek bolmaq. Óıtkeni, bul baǵdarlama bıznesin jalǵastyryp jatqandar úshin ǵana emes, endi bastap jatqan óskeleń urpaq úshin de septigi mol bolaryna senim mol.

- Sizdiń semınaryńyz jastar arasyndaǵy passıonarlyq taqyrybyna arnaldy. Nelikten?

- Passıonarıı - ozyq murat úshin úlken táýekelge barýǵa daıyn tulǵa. Toqtaýsyz izdenistiń sońynda júretin ondaı jandar mańaıyna shýaǵyn shashyp júrip, keýdesine uıalaǵan ozyq ıdeıany ózgege birte-birte sińire bastaıdy. Sol arqyly janyna pikirles jandardyń shoǵyryn qalyptastyrǵanyn ózi de baıqamaı qalady. Ozyq ıdeıasy arqyly magnıtshe tarta biletin onyń batyl minezi ári-beriden soń naǵyz kóshbasshyǵa laıyq tulǵalardy óz mańaıyna toptastyrady. 

- Qazirgi jastar arasynda passıonarııler kóp pe?

- Qazirde jastar arasynda bıznes, ǵylym men medıa jáne basqa saladaǵy jigerlilikti, qaısarlyqty baıqaımyn. Olardyń arasynda naǵyz passıonarııler kóp. Teoretık mamandardyń aıtýyna sensek, jastardyń jyldam jumyla biletin qabileti men synı oılaı alatyn qasıeti úlken ózgeriske alyp kele alady. Joldaýdy tıimdi júzege asyrýda da passıonarıı jastar qoǵamǵa kóptep kerek. Meniń maqsatym da osy. Kóp nárse jastardyń ózine baılanysty ekenine kóz jetkizdirý.

 

Áńgimelesken Qanat Áýesbaı