Joldaýdy iske asyrý arqyly aýylǵa attandyratyn jas mamandarymyzdyń túıitkilderi sheshiledi dep senemin - A.Ábdirov
ASTANA. 27 qańtar. QazAqparat - Astanadaǵy S.Seıfýllın atyndaǵy Qazaq agrotehnıkalyq ýnıversıtetiniń birinshi prorektory, professor Aıtjan Ábdirov, Prezıdent Nursultan Nazarbaevtyń «Áleýmettik-ekonomıkalyq jańǵyrtý- Qazaqstan damýynyń basty baǵyty» atty Qazaqstan halqyna arnaǵan búgingi Joldaýyn iske asyrýdyń arqasynda jyl saıyn aýyldarǵa attanatyn júzdegen jas mamannyń áleýmettik qamtamasyz etilý máselesin sheshýge bolatyndyǵyna senimin bildirdi.
«Joldaýda halyqty jumysqa ornalastyrý, shaǵyn qalalardyń jaǵdaıyn kóterý, áleýmettik qamtamasyz etý máseleleri kóterildi. Halyqty jumysqa ornalastyrý máselesine keletin bolsaq, ol bizge de jaqyn taqyryp. Óıtkeni, biz aýyl sharýashylyǵy mamandaryn daıarlaımyz. Jyl saıyn aýyl sharýashylyǵy mamandyǵy boıynsha 250-300 adamdy aýylǵa jiberemiz. Alaıda, olardyń deni aýylǵa barǵanda jumyssyz júredi. Prezıdent bul túıitkildi sheshý úshin 1 tamyzǵa deıin arnaıy baǵdarlamany ázirleýdi tapsyrdy. Joldaýdyń arqasynda bul másele sheshimin tapsa, úlken jetistik bolar edi. Sondyqtan da biz bul Joldaýǵa úlken senim artamyz», - dep atap ótti A.Ábdirov.
«Alda bizdiń memleketti damytatyn úlken baǵdarlamalar tur. Osy Joldaýdyń taǵy bir úlken maqsaty - ekonomıkamyz ben memleketti alda kútilip otyrǵan daǵdarysqa daıyndap, sodan aman-esen ótý. Elbasy óz Joldaýynda el úshin árbir adamnyń mańyzdylyǵyn atap ótti», - dep túıindedi pikirin prorektor.
