Joldaýdy «áleýmettik Joldaý» dep ataýǵa tolyq bolady- M.Áshimbaev
ASTANA. 27 qańtar. QazAqparat /Qanat Mámetqazyuly/ - Elbasy Joldaýyn «áleýmettik Joldaý» dep ataýǵa bolady.
Búgin QR Parlamenti palatalarynyń birlesken otyrysynda Memleket basshysy Nursultan Nazarbaevtyń Qazaqstan halqyna Joldaýyna baılanysty pikirin bildirgen depýtat Máýlen Áshimbaev osylaı málimdedi.
Depýtattyń aıtýynsha, Joldaý barysynda Elbasy aıqyndaǵan basty 10 maqsattyń negizi áleýmettik maqsattardan turady. Al onda júktelgen mindettiń tolyqqandy oryndalýy halyqtyń turmys sapasyna da tikeleı áser etetin bolady. «Onyń ishinde búgingi tańda halyqty alańdatatyn basty máselelerge toqtalsaq, bular: jaqsy jumys, jaıly baspana, qoljetimdi densaýlyq saqtaý jáne bilim sapasyn arttyrý. Bul baǵyttaǵy bastalǵan jumysty tereńdetýge Prezıdent naqty mindetterdi aıqyndap berdi. Al ony sapaly oryndaý jurtshylyqtyń ómirine tikeleı sep bolatyny sózsiz», - dedi M.Áshimbaev.
Sonymen qatar, depýtat shaǵyn qalalardyń bolashaǵyna qatysty Prezıdent pármenin de joǵary baǵalady. Óıtkeni, atalǵan problema eldiń birqatar óńirlerinde halyqtyń ózekti máselesine aınalǵan bolatyn. «Prezıdent júktegen mindetti júzege asyrý úshin Úkimet naqty baǵdarlama qabyldap, depýtattyq korpýs soǵan qoldaý jasaıtyn bolady», - deıdi M. Áshimbaev.
Onyń aıtýynsha, Elbasy Joldaýynda sybaılas jemqorlyqpen kúres máselesi de aıqyn kóterildi. «Jalpy alǵanda sybaılas jemqorlyqpen kúres kóptegen memleketter úshin ózekti. Al Elbasy kótergen máselede eń aldymen, rasymen de, halyqaralyq tájirıbe zerdelenýi shart. Óıtkeni, eýropalyq memleketterdiń, Azııa elderiniń qyzyqty tájirıbeleri jetkilikti. Bul rette, Qazaqstannyń ózindik erekshelikteri esepke alynǵany oryndy. Bul turǵyda parlamentarıılerdiń alatyn orny eren», - dedi ol.
