Joldaýdy iske asyrý: Eldiń ekonomıka blogyna 10 naqty tapsyrma júkteldi

ASTANA. KAZINFORM – QR Premer-mınıstri Oljas Bektenov QR Prezıdenti Joldaýda alǵa qoıǵan mindetterdi júzege asyrý úshin memlekettiń ekonomıkalyq blogyna 10 naqty tapsyrma berdi.

— Prezıdent Joldaýda jańa ınnovatsııalyq jáne ınfraqurylymdyq ózgeristerdi aıqyndap berdi. Qoıylǵan mindetterdi sheshý úshin, eń aldymen, elimizge tartylatyn ınvestıtsııalar aǵynyn arttyrý kerek. Memleket basshysy jańa ınvestıtsııalyq kezeńdi bastaý qajettigin atap ótti. Sondyqtan biz óte qysqa (on kún) merzimde ınvestorlarmen biryńǵaı ózara is-qımyl tetigin quryp, ınvestıtsııa tartý júıesin túbegeıli jańartýymyz kerek. Investıtsııalar aıasynda tartylǵan árbir teńge normatıvtik aktilermen jáne ońtaıly tájirıbemen bekitilgen myqty kepildiktermen qorǵalýǵa tıis, - dedi ol búgingi Úkimet otyrysynda. 

Sondaı-aq, Oljas Bektenov ekonomıkalyq blok boıynsha mynadaı 10 negizgi is-sharany júzege asyrýdy tapsyrdy:

1. Prezıdent memlekettik sektordy reformalaý baǵytynda naqty usynystar daıyndaýdy tapsyrdy. Ulttyq ekonomıka mınıstrligi memlekettiń ekonomıkadaǵy úlesiniń naqty shegin jáne basqarýǵa qoıylatyn quqyqtyq talaptardy zańnamalyq turǵydan bekitýge tıis. Bıýdjettik baǵdarlamalar ákimshileri qarajatty ýaqtyly ıgerýdi qamtamasyz etýi qajet. Qarjylyq tártipti kúsheıtip, bekitilgen bıýdjet parametrlerin qatań saqtaý jáne árbir teńgeni barynsha tıimdi paıdalanýǵa kúsh salý kerek.

2. Prezıdent bıznesti shekten tys tekseristerden qorǵaý úshin Mindetti talaptar tiziliminiń mańyzdylyǵyn atap ótti.

Ulttyq ekonomıka mınıstrligi Strategııalyq josparlaý jáne reformalar agenttigimen birge Intellekt arqyly retteý ortalyǵynyń qurylýyn eskere otyryp, Mindetti talaptar tizilimin tolyqqandy engizýdi qamtamasyz etsin. Sondaı-aq normatıvtik aktilerge revızııa júrgizip, olardyń Kásipkerlik kodeksine sáıkestigin anyqtaý qajet. Shaǵyn jáne orta bıznesti qorǵaý men yntalandyrý basty orynǵa qoıylýy kerek.

3. Ózderińiz biletindeı, baǵanyń turaqsyz bolýy ınflıatsııa deńgeıine áserin tıgizedi. Biz ony jyl sońyna deıin 11%-dan paıyzdan aspaıtyn deńgeıde ustap turý múmkindigin kórip otyrmyz. Ulttyq ekonomıka mınıstrligine Ulttyq bankpen, ákimdiktermen, Aýyl sharýashylyǵy, Saýda, Ónerkásip, Energetıka mınıstrlikterimen, sondaı-aq Básekelestikti qorǵaý jáne damytý agenttigimen birge Inflıatsııa deńgeıin baqylaý jáne tómendetý jónindegi is-sharalar josparyn oryndaý boıynsha barlyq qajetti sharalardy qabyldaýdy tapsyramyn.

4. Memleket basshysynyń tapsyrmasyn iske asyrý aıasynda jasandy ıntellektini qoldana otyryp, salyq tóleýshini servıstik súıemeldeý tetigin engizý josparlanýda. Qarjy mınıstrligi Tsıfrlandyrý mınıstrligimen birge Memlekettik kirister komıtetiniń Derekterdi óńdeý ortalyǵyn qurýdy qamtamasyz etsin. Tsıfrlandyrý mınıstrligi salyq jáne kedendik ákimshilendirý qyzmetterin kórsetý úshin atalǵan ortalyqty jasandy ıntellektige qatysty qajetti resýrstarmen qamtamasyz etsin.

5. Memleket basshysy shekaradaǵy ótkizý pýnktteriniń ınfraqurylymyn damytýǵa erekshe nazar aýdarady. Olar kólik-logıstıkalyq keshendi damytýdyń mańyzdy elementi bolyp tabylady.

Qabyldanǵan sharalardyń nátıjesinde Eýrazııalyq ekonomıkalyq odaqtyń syrtqy shekarasyndaǵy ótkizý pýnktterinde ótý ýaqyty 2 saǵattan 30 mınýtqa deıin qysqardy. Úkimet shekaradan ótý rásimderiniń barlyǵyn jetildirý boıynsha júıeli jumysty jalǵastyrady. Ótkizý pýktterinde jyldamdyq pen jaılylyq standartqa aınalýǵa tıis. Qarjy mınıstrligine Kólik mınıstrligimen, ákimdiktermen jáne Shekara qyzmetimen birge jyl sońyna deıin Eýrazııalyq ekonomıkalyq odaqtyń syrtqy shekarasyndaǵy 8 ótkizý pýnktin jańǵyrtýdy aıaqtaýdy tapsyramyn. Sonymen qatar keden beketteriniń aınalasyndaǵy ınfraqurylymdy – qoımalar men servıstik nysandardy damytý qajet.

Taýarlardy saqtaý, suryptaý, tasymaldaý jáne tsıfrlyq servısterge ınvestıtsııa salýǵa daıyn ınvestorlar qazirdiń ózinde bar. Qarjy mınıstrligi Kólik, Aýyl sharýashylyǵy, Tsıfrlandyrý mınıstrlikterimen, Shekara qyzmetimen jáne ákimdiktermen birge osy ınfraqurylymdy damytý baǵytynda naqty sharalar qabyldasyn. Atqarylǵan jumystar týraly esepti bıylǵy qazan aıynyń sońyna engizińizder.

6. Tehnologııalar men quzyretter bere alatyn jáne jańa naryqtarǵa jol ashatyn iri ınvestorlardy izdep, olardy elge tartý jumysyn kúsheıtý qajet.
Alaıda ornyqty ınvestıtsııalyq model degenimizdi orta jáne shaǵyn ınvestorlarmen júıeli jumys isteý dep túsinýimiz qajet, olar básekeles orta qalyptastyryp, óńirlerde jumys oryndaryn qamtamasyz etedi.

«Investıtsııaǵa tapsyrys» tetigin jetildirýdiń mańyzy zor, ol jańa býynnyń ǵylymdy kóp qajet etetin óndiristerin qurýdyń qozǵaýshy kúshine aınalýy kerek.
Ulttyq ekonomıka mınıstrligi Syrtqy ister mınıstrligimen birlesip, ınvestıtsııa tartý júıesin túbegeıli jańartý jónindegi is-qımyl josparyn daıyndaýǵa dereý kirissin.

7. Óńdeý ónerkásibine ınvestıtsııa tartýǵa erekshe nazar aýdarý kerek.
Tereń óńdelgen, joǵary tehnologııalyq ónimder óndirisin qoldaý úshin jańa tásilder men yntalandyrý sharalaryn qarastyrǵan jón.

Ulttyq ekonomıka mınıstrligi eki apta merzimde salalyq memlekettik organdarmen birlesip, qosylǵan quny joǵary ónim óndirý jónindegi jobalarǵa ınvestıtsııa tartý sharalaryn ázirlesin. Qajet bolsa, preferentsııalardyń jańa túrlerin qarastyrsyn.

8. Memleket basshysy tsıfrlyq teńgeniń qoldanylý aıasyn keńeıtýdi tapsyrdy.
Ózderińiz biletindeı, keıbir óńirlerde tsıfrlyq teńgeni paıdalaný boıynsha pılottyq jobalar iske asyrylýda. Bul másele meniń tikeleı baqylaýymda.
Qarjylyq shyǵystardyń ashyqtyǵyn jáne ony qadaǵalaýdy qamtamasyz etý úshin biz tsıfrlyq teńge qoldanylatyn jobalardyń sanyn ulǵaıtýdy kózdep otyrmyz.

Memlekettik organdardyń birinshi basshylary tsıfrlyq teńge quralyn paıdalaný arqyly bıýdjet, Ulttyq qor esebinen qarjy baǵyttalatyn salalardy keńeıtý, sondaı-aq jobalardy ulǵaıtý boıynsha túbegeıli sharalardy qabyldasyn.

9. Memleket basshysy Alataý qalasy men onyń erekshe mártebesine aıryqsha nazar aýdardy.
Ulttyq ekonomıka mınıstrligi Úkimetke tikeleı baǵynatyndaı etip, «Alataý qalasy týraly» Prezıdent Jarlyǵynyń jobasyn 5 kún merzimde pysyqtap, Úkimet Apparatyna engizsin.

Sondaı-aq Alataý qalasynyń quqyqtyq rejımine jáne ony basqarýǵa qatysty zańnamalyq aktilerdiń jobalaryn úsh aı merzimde ázirlesin.

Tsıfrlyq damý mınıstrligi bir aı merzimde úzdik halyqaralyq tájirıbeni eskere otyryp, «Aqyldy qalalar» tujyrymdamasyn keńinen taratý boıynsha is-sharalardy ázirlesin.

10. Ulttyq ekonomıka mınıstrligi jyl sońyna deıin óńirler ekonomıkasynyń ósýin qamtamasyz etý úshin áleýmettik-kásipkerlik korporatsııalardyń fýnktsııalary men ókilettikterin keńeıtip, olardy damý ınstıtýttaryna aınaldyrýdy kózdeıtin zańnamalyq túzetýler jobasyn Úkimet Apparatyna engizsin.

Aıta keteıik, kúni keshe Memleket basshysy Jolaýda elge, ásirese óńdeý ónerkásibi salasyna ınvestıtsııa tartýdy ulǵaıtýdy tapsyrǵan edi.