Joldaýdan týyndaıtyn jańa mindetterdiń deni jastarǵa júkteledi - Májilis depýtaty A.Smaıyl
ASTANA. Aqpannyń 13-i. QazAqparat /Gúlmıra Álıakparova/ - Keshe, aqpannyń 12-si kúni QR Parlamenti Májilisiniń depýtaty Aldan Smaıyl Elbasynyń «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Joldaýyn túsindirý jáne talqylaý maqsatynda Astanalyq agrarlyq ýnıversıtette boldy,
dep habarlaıdy QazAqparat S.Seıfýllın atyndaǵy atalmysh oqý ornynyń baspasóz qyzmetine silteme jasap.
Depýtatpen bolǵan kezdesýge ýnıversıtet rektory Aıtbaı Bulashev, jas oqytýshylar men belsendi stýdentter qatysty.
A.Smaıyl, Elbasy óz Joldaýynda Qazaqstan ekonomıkasynyń qaryshtap damýyna ındýstrııalyq-ınnovatsııany damytý arqyly ǵana qol jetkize alatynymyzdy, sondaı-aq eldiń agrarlyq sektoryn ozyq tehnologııalarmen jabdyqtaý qajettigin taǵy bir qadap aıtqanyn tilge tıek etti.
Belgili jazýshy-pýblıtsıst, qoǵam qaıratkeri, árbir qazaqstandyq úshin asa mańyzdy qujattyń ár jolyn jete túsindire otyryp, jastarǵa ulttyq rýhanı qundylyqtar men baı mádenı muralarymyz jaıynda áńgimelep berdi. A.Smaıyl ár jastyń bıik maqsattary men múddeleri patrıottyqqa negizdelýi tıistigin jáne Joldaýdan týyndaıtyn jańa mindetterdiń deni jastarǵa júkteletinin shegelep aıtty.
Sondaı-aq depýtat júzdesý barysynda, qoǵamdy demokratııalandyrý máselelerin, memlekettik til, ulttyq mádenıet pen óner, qazaq ádebıetiniń kókjıekteri týraly óz oılaryn Elbasynyń Joldaýyna baılanystyra áńgimeledi.
Halyq qalaýlysy stýdentter men jas oqytýshylardyń tarapynan túsken saýaldarǵa da tuşymdy jaýaptar qaıtardy.
