Joldaýdan Elbasynyń halqyna degen jyly lebizi men erekshe qamqorlyǵyn seziný qıyn emes - A.Jumaǵulova
ASTANA. QazAqparat - Qarashanyń sońǵy juldyzynda Elbasy halqyna arnap dástúrli Joldaýyn joldady. Jyl saıyn ózgerip otyrǵan jaǵdaılarǵa qaraı beıimdelip, damýdyń jańa baǵyttaryn basshylyqqa alatyn Joldaýǵa qatysty bilim salasy qyzmetkerleri de ún qosýda. ál-Farabı atyndaǵy QazUÝ, Fılologııa jáne álem tilderi fakýltetiniń dotsenti Jumaǵulova Arzan Jahanqyzy «joldaýdan Elbasynyń halqyna degen jyly lebizdiń, erekshe qamqorlyqtyń, taza peıildiń lebi esetinin seziný qıyn emes» degen pikirde.
Álemdi arbaǵan daǵdarystyń ýshyǵyp turǵanyn eskere otyryp, Prezıdent osy tyǵyryqtan shyǵýdyń naqty joldaryn usyndy. «Qazaq halqy óz tarıhynda qazirgideı jaqsy jaǵdaıda ómir súrgen emes» degen Elbasy, osy turmysty baǵalaı otyryp, aırylyp qalmaýdyń joldaryn anyqtap berdi. Jaı qarapaıym mysaldar arqyly-aq aşy shyndyqtyń tigisin jatqyza túsindire otyryp, sanaǵa sińirdi. «Qazaqtyń baqýatty baılary baı bolýdy úırený kerek», «artyna qońyraý taǵyp shet eldi shýyldatpaı» qazaqtyń baılary baılyǵyn el ıgiligine jumsap, syrttaǵy baılyǵyn elge ákelsin dep atap ótti Elbasy. Elimizdiń ekonomıkasyndaǵy qarjy daǵdarysyna jol bermeý úshin «sany bar da, sapasy joq, asta tók shyǵyndar» men atqarǵan jumysy kózge kórinip halyq ıgiligine esh yqpal etpeıtin «maıda-shúıde» kompanııalardyń sanyn azaıtýdy usyndy. Barlyǵy shyndyq. «Qazaqtyń baılary tank sekildi qorbıǵan mashına shyqsa da talasyp minedi». Aşy sarkazm. «Kórpeńe qaraı kósil» degen de osy bolar. Qarapaıym halyqtyń múddesin oılaý, alystan oraǵytyp aldyńa ákelý degen de osy bolar.
Balamyz tek ákim bolyp el basqaryp, bankte istep mol aqsha taýyp, jyly jerde otyrsyn deıtin qazaq emespiz be? Osy bir oıdy seıiltý úshin Elbasy «jumysshy - qurmetti mamandyq» deı otyryp, jumysshy mamandyǵynyń qoǵamdaǵy ornyn atap kórsetti jáne sonyń naqty dáleli retinde óziniń eńbek jolyn mysal etti. Túsingen jasqa bul da naqty baǵyt. Halyqtyń áleýmettik turmysyn jaqsartýdy da Prezıdent esten shyǵarmady. 2016 jyldan bastap qoǵamnyń ár salasyndaǵy qyzmetkerlerge, oqytýshylarǵa, dárigerlerge qosylatyn jalaqy mólsheri de halyqtyń kóńiline senim uıalatty. 2017 jyldan bastap aqysyz tehnıkalyq bilim berýdi qolǵa alý kerek ekendigin de qadap aıtty.
Prezıdent óz Joldaýynda halqyna salmaqty oı tastap, dáleldi tujyrym jasaı otyryp, naqty baǵyt usynyp otyrdy. Joldaý mazmunynda eshbir naýqanshyldyq baıqalmaıdy. Jaılap aıtyp, aqylǵa shaqyrý basym. «Áı, aǵaıyn, aldy - artyńdy baǵdarla, asyp-tókpe, elden qalma, óz jaǵdaıyńdy adalynan óziń jasa, artylsa aǵaıynǵa qaraılas» degenge saıady Elbasynyń oıy. Osynyń ózinen halqyna degen jyly lebizdiń, erekshe qamqorlyqtyń, taza peıildiń lebi esetinin seziný qıyn emes.
Sonymen qatar, Prezıdent joldaýda birligimizdi saqtap, elimizdiń ıgiligi úshin aıanbaı ter tógýimiz kerek ekenin jaqsy túsindirip berdi. Shynynda da, osy qundylyqtarymyz myqty bolsa, kez-kelgen asýdan óte alamyz. Bilim salasyna qatysty aıtylǵan taǵy bir qýantarlyq jaǵdaı 2017 jyldan bastan kásiptik-tehnıkalyq bilim berý júıesi tegin júrgiziletini kóńilimizge unady. Bul joǵary oqý oryndaryna qabyldanbaı qalǵan túlekter úshin tıimdi jol. Sonymen qatar halqymyzdyń áleýmettik jańdaıyn jaqsartý úshin 2016 jyldyń 1 qańtarynan memlekettik qyzmetkerlerge eńbekaqynyń 30% deıin ósetini qýantarlyq jaıt. Elbasy Joldaýynda naqty máselelerge naqty sheshimder qoıylǵandyqtan, jospardyń júzege asatyndyǵyna senimdimiz. Biz, árbir qazaqstandyq, tyǵyryqtan shyǵar jolǵa óz úlesimizdi qosa otyryp, Elbasynyń aldymyzǵa qoıǵan josparyn ıgeremiz degen oıdamyz.
