Joldaýdaǵy jas talanttardy qoldaý kerektigi erekshe qýantady – JOO prorektory

NUR-SULTAN. QazAqparat – Keshe Memleket basshysy Qasym-Jomart Toqaev Qazaqstan halqyna kezekti Joldaýyn usyndy. Joldaýdan soń túrli sala sarapshylary men mamandary pikirlerin ortaǵa salyp jatyr. Osy oraıda Qazaq ulttyq horeografııa akademııasynyń birinshi prorektory Bıbigúl Núsipjanova Joldaýǵa baılanysty pikirimen bólisti, dep habarlaıdy QazAqparat tilshisi.

«Pandemııa halyqtyń ómir súrý salty men deńgeıine qatty áser etti. Saldarynan halyq memlekettiń qoldaýy men qorǵaýyna muqtaj boldy. Osy sátte Prezıdent Qasym-Jomart Toqaev búgingi Joldaýynda halyq óz problemasymen jalǵyz qalmaıtynyn aıqyn kórsetti. Elimizdiń ekonomıkalyq jáne áleýmettik ahýalyn jaqsartý jolynda tyń sharalar qolǵa alynbaq.

El Táýelsizdiginiń 30 jyldyǵyna sáıkes kelip otyrǵan Joldaýda qozǵalǵan negizgi taqyryptardyń biri bilim berý. Memleket basshysy jańa mektepter salý, pedagogtardy materıaldyq kótermeleý, olardyń biliktiligin arttyrý, oqý baǵdarlamalaryn jetildirý, tegin tehnıkalyq jáne kásiptik bilim berýmen tolyq qamtý sekildi jaıttarǵa jeke toqtalyp ótti», - dedi Bıbigúl Núsipjanova.

Sondaı-aq, spıker Memleket basshysy alǵa naqty mindet pen qatar jaýapkershilik júktegenin jetkizdi.

«Óz kezegimizde Qazaq ulttyq horeografııa akademııasy sapaly bilim berýge erekshe kóńil bóledi. Ortalyq Azııadaǵy kóp deńgeıli kásibı horeografııalyq bilim beretin birden-bir oqý orny bola otyryp, biz Prezıdent júktegen jaýapkershilikti sezinemiz. Bizdiń tárbıelenýshilerimiz qazaqstandyq ónerdi búkil álemge tanytyp, pedagogtardyń qulshynysy men kásipqoılyǵynyń arqasynda joǵary kórsetkishterge qol jetkizýde. Osy tusta, Joldaýda aıtylǵan jas talanttardy qoldaý kerektigi erekshe qýantady. Olarǵa joǵary oqý oryndaryna túsý úshin konkýrstan tys negizde granttar berilip, birjolǵy aqshalaı syılyqaqylar tólenetini de aıtyldy», - deıdi ol.