Joldaýdaǵy pedagogtar máselesi halyq qoldaýyna ıe boldy
«Memleket basshysy Joldaýda «Mektepke deıingi bilim berý sapasyn túbegeıli jaqsartý kerek» deı otyryp, bul salada biliktilik talaptaryn, oqytý ádisin, tárbıeshilerdiń jáne balabaqshadaǵy basqa da qyzmetkerlerdiń eńbegine aqy tóleý júıesin qaıta qaraý qajettigin mindettedi. Sondaı-aq, Nazarbaev zııatkerlik mektepteriniń oqytý júıesi men ádistemesi memlekettik mektepter úshin biryńǵaı standart bolýy tıis ekenin atap ótti. Bul ustazdar qaýymyna úlken mindetter júkteıdi. Oqý-aǵartý salasynyń búgingi kún talaptaryna tolyqtaı saı bolýy basty talaptyń birine aınaldy. Sondyqtan osy baǵytta biz nátıjeli jumys atqarýǵa kúsh salýymyz tıis», - dedi Z.Aǵmanova.
Onyń aıtýynsha, taǵy bir aıta keterligi, Elbasynyń orta mektepterdiń ózinde balalardy meılinshe suranysqa ıe mamandyqtarǵa beıimdeý týraly pikiri jas urpaqtyń bolashaǵyn aıqyndaýǵa jol ashady. Ol oqytýdyń jeke baǵdaryn jasaýǵa, oqýshy men muǵalimniń oqý júktemesin azaıtýǵa múmkindik beredi.
«Elbasy óz Joldaýynda kelesi jyly «Pedagog mártbesi týraly» zańdy ázirlep, qabyldaý qajettigin atap ótti. Ol muǵalimder men mektepke deıingi mekeme qyzmetkerleri úshin barlyq ıgilikti qarastyryp, júktemeni azaıtýǵa, jónsiz tekserister men mindetten tys fýnktsııalardan arashalaıtyny aıtylǵan. Shynynda da, bul másele búginde ózekti máseleniń birine aınalǵan edi. Endigi kezekte ondaı kemshilikterge jol berilmeıtini ustazdar kóńilinen tolyqtaı shyǵyp otyr. Sondaı-aq, Memleket basshysynyń joǵary bilim berý isinde oqý oryndarynyń maman daıyndaý sapasyna qatysty talaptar kúsheıtiletini aıtyldy. Ol mamandar daıyndaý máselesinde óz septigin tıgizetini anyq», - deıdi Z.Aǵmanova.
