Joldaýdaǵy mindetter oryndalsa, agrarlyq salaǵa serpilis ákeleri sózsiz -kásipker

QYZYLORDA. QazAqparat - Elbasy Joldaýynda aıtylǵan agrarlyq salada básekege qabiletti ónim óndirip, ony eksportqa shyǵarý máselesin jolǵa qoıý tapsyrmasyna Syr óńiri eńbekshileri úlken qoldaý bildirip otyr. Shıeli aýdany «Aqmaıa» sharýa qojalyǵynyń tóraǵasy Dáýlet Jumbekov ol aýyldyń keıpin jaqsartýǵa óz septigin tıgizetinin aıtady, dep habarlaıdy QazAqparat tilshisi. 

Rasynda, bizdiń elimiz úshin agrarlyq salanyń orny erekshe. El turǵyndarynyń basym bóligi aýyldyq jerlerde turady. Olardyń negizgi tirshiligi - aýyl sharýashylyǵy.

«Elbasy Joldaýynda Qazaqstan halqyna aýyl sharýashylyǵy salasy boıynsha básekege qabiletti ónimderdi mol óndirip, ony eksportqa shyǵaryp, elimizdiń bıýdjetin turaqty túrde tolyqtyra alatyn jetekshi salaǵa aınaldyrý mindetin qoıdy. Ol úshin aýyl sharýashylyǵyna bilikti mamandardy tartyp, jańa tehnologııalar boıynsha jappaı oqytýdy tapsyrdy. Osylaısha, ekonomıkanyń ózge salalary sııaqty agroónerkásip salasy da básekege qabiletti bola alady. Bul bir jaǵynan aýyldaǵy kóńil-kúıdi jaqsartady, aýyl turǵyndary jumyspen qamtyla bastaıdy, ekinshi jaǵynan, aýyldyń keıpin kórkeıtýge múmkindik týady», - dedi D. Jumbekov.

Ótken jyly sharýashylyq 800 gektar alqapqa kúrish ekti. Onyń ár gektarynnan 70 tsentnerden ónim alynǵan.

«Joldaýda Elbasy «2022 jylǵa qaraı eńbek ónimdiligin ulǵaıtyp, óńdelgen aýyl sharýashylyǵy ónimderiniń eksportyn 2,5 esege arttyrý kerek. Memlekettik qoldaýdyń barlyq sharalaryn zamanaýı agrotehnologııalardy tartýǵa baǵyttaý kerek» dep atap ótti», - dedi D. Jumbekov.

Ol Elbasynyń «Aýyl sharýashylyǵy mamandaryn jańa tehnologııalar boıynsha jappaı oqytý kerek. Osy maqsatta jáne ǵylymǵa jyl saıyn 100 mlrd. teńgeden kem emes qarjy qarastyrýdy Úkimetke tapsyramyn» degen mindettemesi agrarlyq salaǵa úlken betburys jasaıtynyn aıtady.