Joldaýda kóterilgen máselelerdiń bilim berý júıesi úshin mańyzy erekshe - sarapshy
ASTANA. KAZINFORM — Ál-Farabı atyndaǵy QazUÝ jýrnalıstıka fakýltetiniń assıstent-professory Meıirgúl Jetpisbaeva Prezıdent Joldaýyna qatysty pikirin bólisti.
– Memleket basshysy Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda elimizdiń uzaq merzimdi damýyna negiz bolatyn mańyzdy strategııalyq baǵyttar aıqyndaldy. Sonyń ishinde jasandy ıntellekt tehnologııalaryn damytý, tsıfrlyq ekonomıkany qalyptastyrý jáne ǵylym men bilimniń áleýetin arttyrý máselelerine erekshe nazar aýdaryldy, – dedi ol.
Sarapshynyń sózinshe, búginde jasandy ıntellekt álemdik ekonomıkanyń, ǵylym men bilimniń, memlekettik basqarý men qoǵamdyq qatynastardyń sıpatyn túbegeıli ózgertip jatyr. Sondyqtan Qazaqstannyń osy tehnologııalyq ózgeristerge beıimdelýi ǵana emes, jańa múmkindikterdi tıimdi paıdalana otyryp, óziniń básekege qabilettiligin arttyrýy aıryqsha mańyzdy.
– Prezıdent Joldaýynda Qazaqstannyń jasandy ıntellektige negizdelgen tsıfrlyq ekonomıka qurýy qajettigin atap ótti. Bul bastamanyń mańyzy tehnologııalyq jańǵyrýmen ǵana shektelmeıdi. Onyń túpki maqsaty – ekonomıkanyń ónimdiligin arttyrý, azamattardyń áleýetin ashý, eńbek naryǵynda jańa múmkindikter qalyptastyrý jáne halyqtyń ómir súrý sapasyn jaqsartý, – dep túsindirdi Meıirgúl Jetpisbaeva.
Sonymen qatar, ol Memleket basshysynyń elimizde tsıfrlyq ınfraqurylymdy damytýdyń alǵashqy mańyzdy qadamdary jasalǵany jónindegi sózin eske saldy. Sýperkompıýterlerdiń iske qosylýy, derekterdi óńdeý ortalyqtarynyń salynýy jáne zamanaýı tsıfrlyq júıelerdiń damýy Qazaqstannyń tehnologııalyq áleýetin kúsheıtýge baǵyttalǵan naqty jumystardyń nátıjesi bolyp otyr.
Zertteýshiniń pikirinshe, tehnologııalyq ınfraqurylymnyń qalyptasýy – úlken jumystyń bastaýy ǵana. Endigi mindet – osy múmkindikterdi naqty ekonomıkalyq jáne áleýmettik nátıjege aınaldyrý. Bul rette ǵylymı qaýymdastyq pen joǵary oqý oryndarynyń jaýapkershiligi arta túsedi.
– Ýnıversıtet oqytýshysy retinde Joldaýda kóterilgen máselelerdiń bilim berý júıesi úshin mańyzy erekshe dep esepteımin. Sebebi jasandy ıntellekt dáýirinde memlekettiń básekege qabilettiligi, eń aldymen, adamı kapıtaldyń sapasyna, ǵylymı izdenisterdiń nátıjeliligine jáne jańa tehnologııalardy meńgergen mamandardyń kásibı deńgeıine baılanysty bolady.Búgingi joǵary oqý oryndarynyń mindeti – stýdentterge tek teorııalyq bilim berý emes, olardyń tsıfrlyq saýattylyǵyn arttyrý, zertteýshilik qabiletin damytý, synı oılaý mádenıetin qalyptastyrý jáne jasandy ıntellekt quraldaryn tıimdi paıdalanýǵa úıretý. Osy turǵydan alǵanda, jasandy ıntellektini bilim berý úderisine júıeli engizýdiń mańyzy zor. Zamanaýı tehnologııalar oqý materıaldaryn bilim alýshylardyń jeke erekshelikterine beıimdeýge, kúrdeli aqparatty taldaýǵa, ǵylymı zertteýler júrgizýge jáne oqytýdyń tıimdiligin arttyrýǵa múmkindik beredi, – dedi ol.
Meıirgúl Jetpisbaeva máseleniń ekinshi qyryna da toqtaldy. Jasandy ıntellektini qoldaný bilim alýshynyń óz betinshe oılaý, izdený jáne sheshim qabyldaý qabiletin álsiretpeýge tıis. Kerisinshe, jańa tehnologııalar adamnyń ıntellektýaldyq múmkindikterin keńeıtetin quralǵa aınalýy qajet. Sondyqtan joǵary bilim berý júıesinde akademııalyq adaldyq, aqparattyq qaýipsizdik, derbes derekterdi qorǵaý jáne jasandy ıntellektini jaýapkershilikpen paıdalaný mádenıetin qalyptastyrý mańyzdy.
Onyń paıymynsha, taǵy bir ózekti másele – otandyq ǵylymnyń jasandy ıntellekt tehnologııalaryn damytýǵa qosatyn úlesi. Qazaqstan daıyn tehnologııalardy tutynýmen shektelmeı, óz ǵylymı sheshimderin ázirleý, ulttyq tsıfrlyq ónimderdi qalyptastyrý jáne ǵylymı jańalyqtardy óndiriske engizýi qajet.
– Bul baǵytta ýnıversıtetter, ǵylymı-zertteý ortalyqtary men óndiris oryndary arasyndaǵy yntymaqtastyqty nyǵaıtý qajet. Ásirese, qazaq tilindegi jasandy ıntellekt júıelerin jetildirý, ulttyq aqparattyq resýrstardy tsıfrlandyrý jáne otandyq ǵylymı ázirlemelerdi kommertsııalandyrý jumystary jańa múmkindikterge jol ashady, – dedi QazUÝ-dyń assıstent-professory.
Aıta keteıik, buǵan deıin Prezıdent Joldaýynan keıin Quryltaı depýtaty Serik Egizbaev aýyl sharýashylyǵy salasynda aıtylǵan túıtkilderge qatysty oı-pikirin bóliskenin jazǵanbyz.
