Joldaýda kóterilgen áleýmettik máseleler qalaı sheshiledi

ASTANA. KAZINFORM — Bıyl Joldaýda kóterilgen bastamalar qalaı júzege asady? Áleýmettik qoldaý júıesinde qandaı ózgerister oryn almaq? Osy jáne ózge de mańyzdy saýaldarǵa Quryltaı depýtaty Lázzat Qojahmetova Jibek Joly telearnasyndaǵy «Búgin Live» baǵdarlamasynda jaýap berdi.

Joldaýda kóterilgen áleýmettik máseleler qalaı sheshiledi
Vıdeodan alynǵan kadr

Depýtattyń aıtýynsha, táýelsizdiktiń 35 jyldyǵy qarsańynda jáne jańa Konstıtýtsııa qabyldanǵannan keıin jarııalanǵan Joldaýda áleýmettik salany reformalaýǵa basymdyq berilgen.

— Qazaqstanda jyl saıyn 6 trln teńgege jýyq qarjy zeınetaqy men járdemaqyǵa jumsalady. Keıingi jyldary oǵan 88 trln teńge baǵyttalǵan. Degenmen halyqtyń ál-aýqatyn tek járdemaqymen sheshý múmkin emes, — dedi depýtat.

Osyǵan baılanysty Eńbek mınıstrligi azamattardy ál-aýqatyna qaraı «A», «B», «C», «D» jáne «E» degen bes sanatqa bólýdi josparlap otyr. Alǵashqy eki sanatqa jatatyn azamattarǵa memlekettik áleýmettik kómek kórsetilmeıdi. Al 14 túrli tólem otbasynyń muqtajdyq deńgeıine qaraı taǵaıyndalmaq. Olardyń qatarynda bala týǵan kezde jáne sábı 1,5 jasqa tolǵanǵa deıin beriletin tólemder de bar.

Jańa júıede otbasynyń ál-aýqaty «Otbasynyń tsıfrlyq kartasy» arqyly baǵalanady. Bul rette tabysy, nesıesi, kóligi men baspanasy, jumyspen qamtylýy, densaýlyq jaǵdaıy, bilim deńgeıi jáne mal sany eskeriledi. Jalpy upaıy 730-dan asqan azamattar aýqatty sanatqa jatqyzylady. Júıeni 2027 jylǵy 1 qańtardan bastap engizý josparlanyp otyr.

Depýtattyń sózinshe, mundaı tásil áleýmettik kómekti shyn muqtaj otbasylarǵa baǵyttap, memlekettik qarajatty tıimdi paıdalanýǵa múmkindik beredi. Máselen, Qazaqstanda 1,5 mln otbasy aýqatty sanatqa jatady. Olardyń áleýmettik tólem alý quqyǵyn qaıta qaraý arqyly únemdelgen qarajatty balabaqsha, mektep jáne ońaltý ortalyqtarynyń ınfraqurylymyn damytýǵa jumsaý kózdelgen.

Bul qajettilik ásirese iri qalalarda aıqyn baıqalady. Depýtat keltirgen derekke súıensek, Qazaqstan halqynyń 64 paıyzy qalada turady, onyń 37 paıyzy Almaty, Astana jáne Shymkent qalalarynda shoǵyrlanǵan.

— Astananyń ózinde 800-ge jýyq balabaqsha bar. Soǵan qaramastan, bul balabaqsha tapshylyǵyn tolyq sheshe almaı otyr. Al balabaqsha — ata-ananyń jumysqa shyǵýyna múmkindik beretin ekonomıkalyq tetik, — dedi spıker.

Infraqurylymdy damytýda erekshe qajettiligi bar balalarǵa jaǵdaı jasaý da mańyzdy. Búginde elimizde ınklıýzıvti bilim alýǵa tıis 237 myńnan astam bala bar. Osy baǵyttaǵy qoldaýdy júıeleý úshin Quryltaı depýtattarynyń bastamasymen «Damýynda erekshe qajettilikteri bar balalardy keshendi qoldaý týraly» zań jobasy ázirlenip jatyr.

Al áleýmettik nysandarmen qatar jalpy ınfraqurylymdy jańǵyrtý úshin Joldaýda «Halyqtyq qurylys» baǵdarlamasy usynyldy. Onyń aıasynda 2029 jyldyń sońyna deıin Ulttyq qordan shamamen 6,5 trln teńge bólý kózdelgen.

Buǵan deıin «Halyqtyq qurylys» baǵdarlamasynyń otandyq óndiristiń damýyna serpin beretini aıtylǵan edi.