Joldaýda kóterilgen bilim máseleleri boıynsha jumys toby quryldy – Ashat Aımaǵambetov

NUR-SULTAN. QazAqparat – Memleket basshysy bıylǵy Joldaýynda bilim salasyna qatysty birqatar máseleni kóterdi. Prezıdent júktegen mindetterdi sheshý maqsatynda mınıstrlik janynan jumys toby quryldy. Bul týraly QR Oqý-aǵartý mınıstri Ashat Aımaǵambetov málim etti, dep habarlaıdy QazAqparat tilshisi.

«Joldaýdaǵy Prezıdent júktegen tapsyrmalar bilim berýdegi eń mańyzdy suraqtardy qamtyp otyr. Onyń ishinde balabaqsha tárbıeshileriniń jalaqysyn kóterip, júktemesin tómendetý bar. Sol sııaqty balabaqshamen tolyq qamtý boıynsha qosymsha is-shara qabyldanady. Odan bólek, «Jaıly mektep» ulttyq jobasy erekshe mańyzǵa ıe. Jańa mektepter qazirgi zamannyń barlyq talabyna saı salynatyn bolady. Bul sapaly bilim berýge áserin tıgizedi. Jalpy joǵaryda aıtylǵan, ıaǵnı Joldaýdaǵy bilimge qatysty máseleler boıynsha jumys toby quryldy», - dedi Ashat Aımaǵambetov mınıstrlikte ótken apparat jınalysynda.

Mınıstrdiń aıtýynsha, Memleket basshysynyń sońǵy Joldaýynda jáne bıylǵy tamyz keńesinde kóterilgen orta bilim salasyna qatysty máseleler keshendi túrde sheshiledi.

«Jumys tobynyń quramynda bilim basqarmalarynyń ókilderi, pedagogter, mektep basshylary, balabaqsha tárbıeshileri, medotıster bar. Memleket basshysy bergen tapsyrmalar sapaly ári ýaqtyly oryndalatyn bolady. Sondyqtan barlyǵymyz jumyla jumys isteımiz», - deıdi ol.

Eske sala ketsek, QR Prezıdenti Qasym-Jomart Toqaev bıylǵy halyqqa Joldaýynda tárbıeshilerdiń jalaqysyn kóbeıtý kerektigin aıtqan edi.

Odan bólek, Memleket basshysy Joldaýda apatty jaǵdaıdaǵy jáne úsh aýysymmen oqıtyn mektep máselesin tolyq sheshýdi tapsyrdy.