Joldaýda kóterilgen bastamalar ekonomıkada birqatar ózekti máselelerdi sheshýge baǵyttalǵan - Á. Isekeshev
ASTANA. QazAqparat - Qazaqstan Prezıdenti Nursultan Nazarbaevtyń Joldaýynda kóterilgen bastamalar ekonomıkada birqatar ózekti máselelerdi sheshýge baǵyttalǵan. Bul týraly QR Investıtsııalar jáne damý mınıstri Áset Isekeshev málim etti.
«Memleket basshysy óziniń joldaýynda ósim men damý baǵytyndaǵy jańa modeldi anyqtap berdi. Ol myqty jeke sektorǵa, adamı kapıtalǵa jáne ekonomıkanyń ártaraptanydrýǵa baǵyttalǵan. Ekonomıkada birqatar ózekti máseleler bar. Mysaly, ekonomıkada memlekettik sektordyń úlesi óte kóp, básekelestiktiń álsizdigi, bankrottyq protsedýralardyń mashaqattyǵy, banktardaǵy problemalyq aktıvter jáne taǵy basqa. Qazaqstan Prezıdenti usynǵan «100 naqty qadam» - Ult Josparyndaǵy ınstıtýtsıonaldy jáne qurylymdyq sheshimder jaqyn merzim ishinde osy jańa modelge kóshýge oń yqpal jasaıdy. Joldaýda aıtylǵan básekelestikti shıratý, bankrottyq úderisterdi jeńildetý, jeke sektordyń bastamashyldyǵyn kúsheıtý syndy máseleler elde qıyn jaǵdaıda turǵan kompanııalarǵa qajetti ınvestıtsııalyq belsendilikti arttyrýǵa múmkindik beredi», - dedi mınıstr.
Onyń sózine qaraǵanda, Joldaýda atap kórsetilgenindeı, Qazaqstan Ortalyq Azııada eńbek resýrstary boıynsha aımaqta kóshbasshy elge aınalýy shart.
«Ekinshiden, bul Joldaýda adamı kapıtaldyń damýyna óte úlken mán berildi. Qazaqstan Ortalyq Azııada eńbek resýrstary boıynsha, ásirese tehnıkalyq mamandyqtar boıynsha kóshbasshy atanýy tıis. Úshinshiden, ındýstrıaldyq jobalardyń barlyǵy álemdik ahýalǵa baılanysty azdap ózgeredi. Negizgi basymdyq ınvestıtsııalardy tartýǵa beriledi. Bıýdjettik qarajat esebinen jobalardy júzege asyrý tolyqtaı toqtatylady, qarajattar endi jeke menshik sektordan nemese memlekettik jeke menshik seriktestik aıasynda tartylady», - deıdi mınıstr.
Sonymen birge, Qazaqstanda aımaqtyq erekshelikterge baılanysty ınvestıtsııalyq áriptestikti óńirlerde damytý kózdelgen.
«Sondyqtan, kelesi jylǵa jobalardy júzege asyrýdy kózdeıtin bul baǵdarlama men «Nurly jol» baǵdarlamasy óńirlerde jumys oryndaryn saqtap qana qoımaı, ónerkásiptik kásiporyndardyń jumysyn turaqtandyrýǵa, jańa modeldi júzege asyrýǵa múmkindik beredi. Menińshe, bul Joldaý jaqsy serpin beredi. Memleket basshysy aıtqandaı, ol bolashaq damýǵa baǵyttalǵan jáne onyń maǵynasy da osynda dep sanaımyn», - dedi Á. Isekeshev.
