Joldaýda qoǵamdaǵy eń ózekti máseleler aıtyldy - Qalı Sársenbaı

ALMATY. QazAqparat - «Ana tili» gazetiniń bas redaktory Qalı Sársenbaı Prezıdent Joldaýyna qatysty pikir bildirdi, dep habarlaıdy QazAqparat tilshisi.

«Memleket basshysy Qasym-Jomart Toqaevtyń jyl saıynǵy Joldaýy - elimizdiń damý baǵytyn aıqyndaıtyn negizgi qujattyń biri. Bul Joldaýda da Prezıdent elimizdegi basty máselelerge toqtalyp, olarǵa nazar aýdardy. Atap aıtar bolsaq, sport salasy. Bıyl Tokıo Olımpıadasynda birde bir altyn, kúmis alǵan joq. Tek qolamen shekteldik. Osyǵan oraı, Memleket basshysy sporttaǵy ahýaldy bólek keńeste qaraý qajettiligi týyndaǵanyn aıtty. Demek, sport salasynda aldaǵy ýaqytta irgeli izdenister, ózgerister, jalpy reforma júrýi tıis degen oıdy bildiredi dep oılaımyn», - dedi ol.

Joldaýda aıtylǵan ǵylym salasyna baılanysty spıker óz oıyn bylaısha jetkizdi.

«Memleket basshysy Joldaýynda ǵylymdy damytý bizdiń asa mańyzdy basymdyǵymyz dep atap kórsetti. Mysaly, grant merzimin úsh jylmen shekteý ǵylymdy damytýǵa edáýir kedergi keltirip otyrǵanyn aıta kele, granttyń merzimin bes jylǵa uzartý týraly aıtty. Demek, endigi ýaqytta ǵylym salasynda úlken izdenister men ózgerister jasaýǵa múmkindik týady dep oılaımyn», - dedi Qalı Sársenbaı.

Ol Joldaýda til máselesi onyń ishinde qazaq tiliniń mańyzdylyǵy jaıynda naqty jaýap berildi dep sanaıdy.

«Ata zańymyz boıynsha Qazaqstanda jalǵyz memlekettik til bar, ol qazaq tili. Prezıdent bolashaǵyn Otanymyzben baılanystyratyn árbir azamat qazaq tilin úırenýge den qoıýy, bul otansúıgishtiktiń basty belgisi ekenin, demek, elimizdi mekendeıtin barlyq dıasparolardyń qazaq tiliniń úırenýi, memlekettik tilge degen qurmetin kórsetýi, ol basty mindeti bolýy tıis ekenin atap ótti», - ol.

Qalı Sársenbaı kitaphanashylardyń jalaqysyn ósirý óte oryndy bolǵanyn aıtty.

«Shynyn aıtqanda aýyldy jerlerde kitaphanalardyń qazirgi jaǵdaıy óte múshkil dese bolady. Bul rette kitaphanashylardyń eńbegin baǵalaý, ony qanaǵattandyrý - osy salany damytýdyń eń basty sharty. Sondyqtan kitaphanashylardyń jalaqysyn kóterý óte oryndy boldy».

Onyń aıtýynsha, Prezıdenttiń daryndy jastardy tikeleı memlekettiń qamqorlyǵyna alý týraly Úkimetke arnaıy tapsyrma berýi, óte qýanyshty jaǵdaı boldy.