Joldaýda ekonomıkalyq kategorııalar boıynsha qoǵamnyń barlyq spektri qamtylǵan - sarapshy

ASTANA. QazAqparat – Ekonomıkalyq saıasat ınstıtýtynyń dırektory Qaıyrbek Arystanbekov Memleket basshysynyń Qazaqstan halqyna arnalǵan jańa Joldaýy boıynsha pikir bildirdi, dep habarlaıdy QazAqparat tilshisi.

- Jańa joldaýdyń mańyzdy tustary men ereksheligi nede?

- Meniń baǵalaýym boıynsha, bul - sońǵy 10 jyldaǵy eń úzdik joldaýdyń biri. Ekonomıkalyq kategorııalar boıynsha qoǵamnyń barlyq spektrin qamtıdy jáne memlekettiń ekonomıkalyq saıasatyna basa nazar aýdarylǵan. Prezıdent aldaǵy saıasattyń negizgi parametrlerin salalyq turǵydan naqty atap ótti. Bul - aýyl sharýashylyǵy, ónerkásip, ınfraqurylym, týrızm jáne ekonomıkanyń basqa da negizgi salalary. Osy turǵydan alǵanda, joldaý minsiz. Biraq, maǵan bárinen buryn unaǵany - ekonomıkalyq saıasattyń bıýdjetaralyq qatynastary týraly tusy. Bizdiń baǵalaýymyz boıynsha, bıýdjetti ortalyqtandyrýǵa shamadan tys kóńil bólý - atalǵan salany damytýdaǵy tejeýlerdiń biri boldy. Qazir Memleket basshysy ortalyqsyzdandyrý qajet ekenin naqty atap ótti. Mysaly, elorda ákimi Qarjy mınıstrine qaraǵanda qaladaǵy problemalardy jaqsy biledi.

- Sizdiń oıyńyzsha, aýdan ákimderi jergilikti bıýdjet qarajatyn basqarý boıynsha zor jaýapkershilikti moyıdaryna alýǵa daıyn ba?

- Olar sol úshin de ákim, jaýapkershilikti óz moınyna alýy tıis. Eger olar daıyn bolmasa, otstavkaǵa ketýi kerek.

- Shaǵyn jáne orta kásipkerlikti damytý jáne óńdeý ónerkásibin ilgeriletý týraly ne aıtasyz?

- Kásipkerlik normalarǵa baılanysty biz orta bıznesti joǵalttyq. Eger sońǵy 5 jyldaǵy dınamıkany qarastyratyn bolsaq, orta bıznes sýbektileriniń sany 2 ese qysqardy. Meniń oıymsha, osy oraıda Prezıdent orta bıznesti qoldaýymyz kerektigin aıtty. Nelikten bizde shaǵyn bıznes jaqsy jolǵa qoıylǵan? Sebebi, orta bızneske belgili bir salyq júktemesi bar jáne ony boldyrmaý úshin kompanııalar nazardy shaǵyn bızneske bóle bastady.

- Atom elektr stantsııasynyń qurylysyna qatysty referendým jarııalanyp, bul máseleni halyq sheshetin aıtyldy. Osyǵan qatysty ne oılaısyz?

- Bul - memlekettiń ómirlik mańyzdy máselelerdi sheshýdegi qýatty quqyqtyq, konstıtýtsııalyq-quqyqtyq quraly. Zańnyń ústemdigi saqtalatyn quqyqtyq memleket mundaı jahandyq máselelerdi referendým ótkizý arqyly sheshedi. Zań turǵysynan alsaq ta, Prezıdent AES salýǵa qatysty sheshimdi halyqtyń ózi sheshýi kerektigin naqtylap berdi.

- Memlekettik aktıvterdi jekeshelendirý jáne kvazımemlekettik sektordy reformalaýǵa qatysty pikirińiz...

- Aldaǵy jyldan bastap jekeshelendirýdiń kelesi kezeńi bastalady. Kvazımemlekettik sektor naryqta belgili bir úlesti alady. Jazylmaǵan ereje bar, kvazımemlekettik sektor jeke sektorǵa aralaspaýy kerek. Osy sebepterge baılanysty kvazımemlekettik sektordyń úles salmaǵyn azaıtý mindeti tur.

- Áńgimeńizge rahmet!