Joldaýda aıtylǵan úsh negizgi mindet qandaı – carapshy pikiri

NUR-SULTAN. QazAqparat – Prezıdent Joldaýy – el basshylyǵynyń daǵdarystan keıin ekonomıka men azamattardyń ál-aýqatyn qalpyna keltirý jónindegi is-qımylynyń aıqyn jáne naqty jospary. Bul pikirdi QR Prezıdenti janyndaǵy Qazaqstan strategııalyq zertteýler ınstıtýtynyń (QSZI) dırektory Zarema Sháýkenova bildirdi, dep habarlaıdy QazAqparat.

Sarapshy «Prezıdent Qasym-Jomart Toqaevtyń bıylǵy Joldaýynda quzyretti organdar men búkil qoǵam aldyna qoıatyn ózara baılanysty úsh mindeti naqty aıqyndalǵan. Onyń birinshisi – azamattardyń osal sanattaryna kómek kórsetý jáne áleýmettik tólemderdi qoljetimdi ete túsý, sonyń ishinde ataýly áleýmettik kómek, ádil salyq salý baǵyty, turǵyn úı, medıtsınalyq jáne bilim berý qyzmetteriniń qoljetimdiligi, adam quqyqtaryn qorǵaý», - dedi Z. Sháýkenova.

Ekinshi mindet – memlekettik qyzmetshilerdiń shtatyn qysqartýǵa baǵyttalǵan memlekettik apparatty jańartý. Munda Strategııalyq josparlaý jáne reformalar agenttigin, Tótenshe jaǵdaılar mınıstrligin qalpyna keltirý, memlekettik qyzmet kórsetýdiń jáne ulttyq kompanııalar qyzmetiniń ashyqtyǵyn arttyrý, jergilikti bılik organdarynyń róli men azamattardyń eldegi saıası ómirge qatysýyn arttyrý usynylǵan.

«Úshinshi mindet – kásipkerlikti jan-jaqty qoldaý, ishki jalpy ónimniń quramyndaǵy qosymsha taýarlar úlesin arttyrý, sheteldik ınvestıtsııalardy tartý, damýdyń bıýrokratııalyq, sybaılastyq jáne basqa kedergilerin jeńý, kóleńkeli ekonomıkaǵa qarsy turý arqyly ekonomıkany qaıta qalpyna keltirý. Ulttyq ál-aýqattyń turaqtylyǵyn arttyrýdyń negizgi baǵyttarynyń biri retinde Prezıdent álemdik naryqta qazaqstandyq ónimniń básekege qabilettiligi men QR eksporttyq áleýetin arttyrý qajettigin atady. Bul rette orta bızneske erekshe nazar aýdaryldy», - deıdi sarapshy.