Joldaýda adamı kapıtal sapasyn jaqsartýǵa aıryqsha kóńil bólingen - sarapshy
ASTANA. QazAqparat - Elbasy Nursultan Nazarbaevtyń bıylǵy Joldaýynda adamı kapıtal sapasyn jaqsartýǵa aıryqsha kóńil bólingen. Bul pikirdi QR Prezıdenti janyndaǵy Qazaqstannyń strategııalyq zertteýler ınstıtýty ekonomıkalyq zertteýler bólimi jetekshisiniń mindetin atqarýshy Naılıa Álmuhamedova bildirdi.
«Jańa tehnologııalyq qurylysqa aýysý, bilim, aqparat ekonomıkasynyń damýy kezeńinde adamı kapıtal eldiń ekonomıkalyq ósýiniń mańyzdy faktory sanalady. Halyqaralyq sarapshylardyń baǵalaýynsha, adamı kapıtaldyń 1 paıyzǵa artýy eńbek ónimdiliginiń 3,81 paıyzǵa ósýine ákeledi. Sondyqtan da Prezıdent óziniń Qazaqstan halqyna arnalǵan Joldaýynda onyń erekshe mańyzdylyǵyn atap ótti. Buǵan qosa, Joldaýda aıtylǵan 5 basymdyqtyń ishinde adamı kapıtal sapasyn jaqsartýǵa erekshe kóńil bólingen», - dedi Álmuhamedova.
Onyń aıtýynsha, Memleket basshysynyń Joldaýyna sáıkes adamı kapıtaldy damytý jáne odan ary joǵarylatý maqsatynda birneshe negizgi baǵyt boıynsha naqty is-sharalar júrgiziledi. Atap aıtqanda, olar bilim berý, medıtsına jáne áleýmettik qamtamasyz etý salalaryn qamtıdy.
«Osy sharalardyń ishinde «Barshaǵa arnalǵan tegin kásiptik-tehnıkalyq bilim berý» jobasyna toqtalǵym keledi. Bul jobaǵa sáıkes memleket qazaqstandyqtarǵa alǵashqy jumys mamandyǵyn tegin meńgerýge múmkindik jasamaq», - dedi ol.
Naılıa Álmuhamedova atalǵan jobanyń sátti júzege asýy jumysyzdyq deńgeıiniń tómendeýine jáne jańa salalarǵa qajetti mamandardy daıyndaýǵa qosymsha serpin bererine senimdi.
«Osy oraıda bilikti mamandardy daıyndaý úshin oqý úrdisine óndiristegi oqytýdyń álemdik tájirıbesin qamtıtyn qazirgi zamanǵy bilim standarttaryn qoldaný qajet», - dep túıindedi oıyn sarapshy.
