Joldaý júzege asýda: Almatyda 173 myń adamnyń jalaqysy kóteriledi
Qalalyq Jumyspen qamtý jáne áleýmettik baǵdarlamalar basqarmasynyń habarlaýynsha, jyl sońyna deıin kásiporyndar 173 myń jumysshynyń jalaqysyn kóterýge nıet bildirgen. Olardyń arasynda jalaqysy 50 myń teńgeden aspaıtyn memlekettik, jekemenshik qurylym eńbekkerleri de bar.
Qala ákimshiligi barlyq bıznes qurylymdarymen, ónerkásip ıelerimen, kásiporyn basshylarymen Elbasynyń Joldaýynda aıtylǵan jalaqy kóterý máselesine qatysty túsindirý jumystaryn júrgizip otyr.
«Elbasynyń Joldaýyna eń birinshi bolyp júıequraýshy iri kompanııalar ún qosty. 109 iri kásiporyn óz qyzmetkerleriniń 45 000 teńge deńgeıindegi aılyǵyn 75 000-ǵa deıin kóterýge ynta bildirdi. Jyl sońyna deıin qaladaǵy barlyq 400 jumys berýshi osy bastamany qoldaıdy», - delingen basqarma taratqan habarlamada.
Atap aıtqanda, «Almaty kópir konstýrktsııalary zaýyty» JShS qyzmetkerleri endi 130 myń emes 175 myń teńge aılyqqa qol jetkizdi. Keıbir tsehterde jumysshylar eńbeginiń óteýine 250 myń teńgege deıin alady.
Sonymen qatar, «Almaty aýyr mashına jasaý zaýyty» AQ eńbekaqy qoryn qaıta qarap, 50 myń teńge alatyn jumysshylardyń aılyǵyn 77 myń teńgege kótermek.
«Álmerek» farmatsevtıkalyq kompanııasy - 50 myń teńgeden 70 myń teńgege deıin, «Rahat» kondıterlik fabrıkasy AQ - 83 myń teńgeden 90 myń teńgege arttyrdy.
Sondaı-aq, keıbir jumys berýshiler tómen aılyq alatyn azamattar bolmasa da, barlyǵynyń aılyǵyn kóterýge daıyn ekendigin jetkizdi. Máselen, «Zeta Engeeniring» JShS aılyqty 43%, «KazAvtoSteklo» JShS - 20%, «AST Elast» JShS 17% kótermek.
Eske sala ketsek, Memleket basshysy Nursultan Nazarabaev halyqqa arnalǵan bıylǵy Joldaýynda 2019 jyldan bastap eń tómengi jalaqyny 1,5 esege ósirýdi tapsyrdy.
Osy maqsattarǵa 2019-2021 jyldarda respýblıkalyq bıýdjetten jyl saıyn 96 mıllıard teńge bólinedi.
