Joldaý júktegen mindetter: Túrkistanda memlekettik qyzmet mektebi ashyldy
Mekteptiń ashylý saltanatyna QR Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Ǵalym Tursynbaev pen Q.A.ıAsaýı atyndaǵy Halyqaralyq qazaq-túrik ýnıversıtetiniń prezıdenti Bolatbek Ábdirásilov, «Syrdarııa» ýnıversıtetiniń rektory Serik Daıyrbekov jáne stýdentter qatysty.
Departament basshysynyń aıtýynsha, Elbasy elimizdiń kemel bolashaǵy jastarmen baılanysty ekenin eskerip, 2019 jyldy - Jastar jyly dep jarııalaýdy usyndy.
Atap ótilgendeı, jańadan ashylǵan memlekettik qyzmet mektebiniń maqsaty - memlekettik qyzmetke eń myqty, bilimdi, bilikti, patrıottyq sezimi joǵary jastardy tartý bolmaq. Ol úshin agenttik tarapynan qoldaý kórsetilip, jastardy memlekettik qyzmetke ornalastyrýǵa yqpal jasalady.
Óz kezeginde oqý ornynyń prezıdenti Bolatbek Ábdirásilov agenttik tarapynan stýdentterdi qoldaý baǵytynda júrgizilip jatqan jumystarǵa rızashylyǵyn bildirip, JOO-dan atalǵan mektepke eń laıyqty stýdentter iriktelgenin atap ótti.
Memlekettik qyzmetshiler mektebiniń ashylý saltanatynan keıin ýnıversıtet pen Memlekettik qyzmet isteri departamenti arasynda yntymaqtastyq týraly memorandýmǵa qol qoıyldy.
Eske salaıyq, Memleket basshysy Nursultan Nazarbaev bıylǵy qazan aıyndaǵy Joldaýynda jastar men otbasy ınstıtýtyn keshendi qoldaý memlekettik saıasattyń basymdyǵyna aınalýy tıistigin atap óte kele, kelesi jyldy Jastar jyly dep jarııalaýdy usyndy.
Sondaı-aq Elbasy QR Prezıdenti janyndaǵy Memlekettik basqarý akademııasy men Nazarbaev Ýnıversıtetine birlese otyryp, memqyzmetshiniń kásibıligin arttyratyn baǵdarlama ázirleýdi júktedi.
Jańa formatsııanyń memlekettik qyzmetshileri memleket pen qoǵamnyń arasyndaǵy qashyqtyqty qysqartýy tıis. Bul - turaqty túrdegi keri baılanys, qyzý talqylaý, adamdarǵa naqty qadamdar men nátıjelerdi túsindirý.
Budan bólek, Nursultan Nazarbaev qol qýsyryp otyratyn memlekettik qyzmetshilerdi qatań synǵa aldy.
