Joldaý jastarǵa aıqyn baǵyt-baǵdar berdi – sarapshy tsıfrlyq jumyspen qamtý týraly
ASTANA. KAZINFORM – Tsıfrlyq ekonomıkany damytý, jastardy jumyspen qamtý jáne aýyl jastaryna teń múmkindik jasaý – Memleket basshysynyń Joldaýynda kóterilgen mańyzdy máselelerdiń qatarynda. Qazaqstan Halyq Keńesiniń múshesi, «Jastar» ǵylymı-zertteý ortalyǵynyń dırektory Naıla Muhtarova osyndaı pikir bildirdi.
Onyń aıtýynsha, Prezıdent Joldaýda jastarǵa qoldaý bildirip qana qoımaı, el damýyna belsendi atsalysýdy jáne ár azamattyń óz jaýapkershiligin sezinýin talap etetin naqty mindetterdi aıqyndady.
Joldaýdaǵy basym baǵyttardyń biri – halyqqa qoljetimdi tsıfrlyq ekonomıkany damytý. Naıla Muhtarovanyń pikirinshe, ınternet tek kóńil kóterip, aqparat tutynatyn orta bolyp qalmaýy kerek. Ol eńbek etip, kásip ashýǵa jáne jańa ónim jasaýǵa múmkindik beretin keńistikke aınalýǵa tıis.
– Smartfon ýaqytty bosqa ótkizetin qymbat oıynshyq emes, adal tabys tabýdyń quraly bolýy tıis, – dedi sarapshy.
Ol Úkimettiń jyl sońyna deıin tsıfrlyq jumyspen qamtýdy jeńildetetin arnaıy quqyqtyq rejım ázirleý josparyna da nazar aýdardy. Bul bastama frılans, ınternet arqyly saýda jasaý, tsıfrlyq platformalarda jumys isteý jáne kontent óndirý salalaryndaǵy qyzmetti rettep, oǵan qatysýshylar úshin túsinikti ári qolaıly jaǵdaı qalyptastyrýǵa múmkindik beredi.
Sarapshynyń paıymdaýynsha, mundaı jumys túrleri qazirgi jastardyń ómir saltyna saı keledi. Sonymen qatar kásibı qabiletin shyńdap, eńbek naryǵynda óz ornyn tabýyna jol ashady.
– Joldaýdaǵy taǵy bir mańyzdy oı – adamnyń múmkindigi onyń qaı jerde turatynyna baılanysty bolmaýǵa tıis. Aýyldaǵy jas qaladaǵy qurdasymen birdeı básekege túse alýy kerek, – deıdi Naıla Muhtarova.
Onyń sózinshe, bul úshin aýyl sharýashylyǵy ónimderin ótkizýdiń tsıfrlyq arnalaryn damytý, ınfraqurylymdy jańǵyrtý, eldi mekenderdi gazben jáne sapaly aýyzsýmen qamtamasyz etý mańyzdy.
Atap aıtqanda, aýyl óndirýshileriniń ónimin tsıfrlyq platformalar arqyly satýǵa baǵyttalǵan pılottyq jobalar men «Halyqtyq qurylys» baǵdarlamasy aıasynda ınfraqurylymdy damytý óńirlerdiń ekonomıkalyq áleýetin arttyrýǵa yqpal etedi.
Sarapshy munyń arqasynda jastar týǵan jerinde de óz qabiletin iske asyryp, bolashaǵyn qalyptastyrýǵa múmkindik alatynyn atap ótti.
Naıla Muhtarova jastardy eńbekke tartý máselesine de toqtaldy. Onyń aıtýynsha, oqymaıtyn da, jumys istemeıtin de jastardyń úlesi azaıǵanymen, bul baǵyttaǵy másele áli de ózekti.
Sarapshy keltirgen derekke sáıkes, 2026 jyldyń ekinshi toqsanynda mundaı jastardyń úlesi 5,7 paıyzdy quraǵan. Bul kórsetkishtiń artynda 300 myńnan astam jas tur.
– Tsıfrlyq eńbek olardyń kóbi úshin eńbek naryǵyna qaıta oralýdyń eń qoljetimdi joly bolýy múmkin. Árıne, kez kelgen múmkindik jaýapkershilikpen qatar júredi, – dedi ol.
Sarapshynyń pikirinshe, «Adal azamat» qundylyqtary kúndelikti ómirde de, qoǵamnyń tsıfrlyq ózgeristerge beıimdelýi kezeńinde de mańyzyn joǵaltpaıdy.
– Joldaý jastarǵa aıqyn baǵyt-baǵdar berdi. Endigi ortaq mindetimiz – berilgen múmkindikterdi naqty iske aınaldyryp, ár jastyń óz áleýetin tolyq ashýyna jaǵdaı jasaý, – dep túıindedi Naıla Muhtarova.
Esterińizge sala keteıik, 28 qazanda Memleket basshysy Qazaqstan halqyna jyl saıynǵy Joldaýyn jarııalady.
