Joldaý Jańa Qazaqstandy qurýda aıanbaı eńbek etýge shaqyrady

Nátıjesinde, 15 jyl ishinde ulttyq ekonomıkanyń kólemi 1997 jylǵy 1,7 trıllıon teńgeden 2011 jyly 28 trıllıon teńgege ósti. 1999 jyldan bastap Qazaqstannyń ІJÓ-niń jyl saıynǵy ósýi 7,6%-dy qurap, aldyńǵy qatarly elderdi basyp ozdy. Jan basyna shaqqanda ІJÓ 1998 jylǵy 1500 dollardan 2012 jyly 12 myń dollarǵa jetip, 7 eseden astam ósti. Biz syrtqy saýdanyń - 12 ese ósýine, al ónerkásip ónimin óndirý kóleminiń 20 ese ósýine qol jetkizdik. Osy jyldar ishinde munaı óndirý - 3 ese, tabıǵı gaz óndirý 5 ese ulǵaıdy. Biz shıkizat resýrstarynan túsken kiristi Ulttyq qorǵa jiberdik.

Sonymen qatar respýblıkada «údemeli ındýstrııalandyrý baǵdarlamasy aıasynda 2010 jyldan bastap jalpy quny 1 797 mlrd teńge bolatyn 397 ınvestıtsııalyq joba iske asyryldy, 44 myńnan astam jumys orny ashyldy. Ortasha aılyq jalaqy 9,3 ese ósti. Zeınetaqy tólemderiniń ortasha mólsheri 10 ese ulǵaıdy. Halyqtyń naqtyly aqshalaı kiristeri 16 ese ósti.

1993 jyly biz «Bolashaq» atty bire­geı baǵdarlama qabyldadyq, sonyń arqasynda 8 myń talantty jas álemniń tańdaýly ýnıversıtetterinde ozyq bilim aldy. Astanada halyqaralyq standarttar boıynsha jumys isteıtin zamanaýı ǵylymı-zertteý ýnıversıteti quryldy. Elektrondy úkimet azamattardyń memleketpen ózara is-qımylyn edáýir jeńildetti. Biz memlekettik basqarýda ózindik turǵyda tóńkeris jasaýǵa qol jetkizdik, ony halyqqa memlekettik qyzmetterdi kórsetý sapasyn arttyrýǵa qaıta baǵdarladyq».

Osylaısha 2030 strategııasynda belgilengen negizgi mindetter oryndaldy, qalǵandary oryndalý ústinde. Sondyqtan Elbasy Joldaýynda negizdelgen elimiz damýynyń jańa strategııasy «Qazaqstan - 2030-dyń» úılesimdi jalǵasy bolyp tabylady. «Qazaqstan-2050» strategııasy - bul tym qubylmaly tarıhı jaǵdaıdaǵy jańa Qazaqstan úshin jańa saıası baǵyt. Qazaqstan 2050 jylǵa qaraı álemniń eń damyǵan otyz eliniń qatarynda bolýǵa tıis.

Osynaý órshil maqsat-mindetterdi is júzine asyrý qaı salada bolsyn qarbalas jumystardy talap etetini daýsyz. Onyń ishinde bilim berý salasynyń aldynda turǵan mindet asa jaýapty ekeni daýsyz. Óz damýynyń qubylmaly álemdegi jańa kezeńine qadam basqan elimizdiń qatań básekelestikte jahandyq ekonomıkalyq taıtalasqa daıyn bolýy - osy mindetter­di iske asyratyn mamandardyń bilik­tiligine baılanysty.

Sondyqtan Qazaqstan damýynyń jańa strategııasy joǵary mekteptiń aldyna qoıatyn mindet asa jaýapty: «Kásibı-tehnıkalyq jáne joǵary bilim eń birinshi kezekte ulttyq ekonomıkanyń mamandarǵa degen qazirgi jáne keleshektegi suranysyn barynsha óteýge baǵdar ustaýy kerek. Kóp jaǵynan bul halyqty eńbekpen qamtý máselesin sheship beredi».

Elbasy bilim berý salasynda halyqaralyq úlgidegi kýálikter berý arqyly ınjenerlik bilim berýdi jáne zamanaýı tehnıkalyq mamandyqtar júıesin damytý mindetin alǵa qoıdy. Osy oraıda ınjenerlik bilim berý júıesin damytý aıasynda bizdiń ýnıversıtet bazasynda «Qazaqstan joǵary tehnıkalyq oqý oryndarynyń respýblıkalyq assotsıatsııasyn» qurý baǵytyndaǵy jumystar qolǵa alynbaqshy.

Sonymen qatar halyqaralyq úlgidegi kýálikter berýdegi álemdik tájirıbeni zertteý jáne usynystar ázirleý jóninde jumys toby qurylady. Keshen aıasynda qoldanbaly jáne akademııalyq ǵylym men bıznes qaýymdastyq birlesken zertteýler júrgizedi, tehnıka men tehnologııanyń basym baǵyttary boıynsha tájirıbelik úlgiler jasalady. Munaı-gaz, taý-ken-metallýrgııa, mashına jasaý salalarynda joǵary tehnologııaly óndiristi qurý jónindegi syzba jáne tehnologııalyq jumystardy atqarýǵa tıis ǵylymı-shyǵarmashylyq ujymdar qurylady.

Sondyqtan da Elbasynyń bıylǵy Joldaýynan bastaý alatyn mindetterdi oryndaý jańa álemdegi Jańa Qazaqstandy qurýda aıanbaı eńbek etýge shaqyrady.