Joldaý zaman talabyna saı ómir súrýge múmkindik beredi- Aqtóbelik metallýrgter
AQTÓBE. QazAqparat - Jastar jańa tehnologııany oqý oryndarynda meńgerýi qajet. Bul týraly aqtóbelik metallýrgter aıtty, dep habarlaıdy QazAqparat tilshisi.
Aqtóbelikter Elbasy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýymen tanysyp shyqty. Alǵashqylardyń biri bolyp metallýrgter óz pikirin bildirdi. Olar jumysshylardy daıyndaý kezinde joǵary oqý oryndarynyń bazasyn qaıta jańartý qajet dep esepteıdi. Sebebi, teorııa men tájirıbeniń arasynda eshqandaı aıyrmashylyq bolmaýy kerek.
«Elbasy óz Joldaýynda bilim berýdiń jańa sapasyna toqtalyp, tehnıkalyq jáne kásiptik bilim berý baǵdarlamasyn jańartý qajet dep atap ótti. Biz metallýrg bolǵandyqtan óndiriske qajetti kásibı mamandardyń qatary kóp bolǵandyǵyn qalaımyz. Metallýrgııa salasyn damytý barysynda balqytýshylarmen qatar óndiriske asa qajetti dánekerleýshiler, qojshylar, dozalaýshylar, kran mashınısi sııaqty mamandardy daıyndaıtyn kásibı tehnıkalyq bilim ordasynyń bazalyq deńgeıi, oqytý baǵdarlamalary jańartylyp, zaman talabyna saı mamandardyń daıyndalǵanyn qalaımyz. Al zaýyttyń bilikti jumysshylary jas mamandardyń bilimi men biliktiligin arttyrýǵa kómektesedi»,- dedi Aqtóbe ferroqorytpa zaýyty №2 balqytý tsehynyń bastyǵy Ábilqaıyr Sotqarov.
Aqtóbelik metallýrgter sońǵy jyldary salynǵan №4 tsehta jumys istep jatyr. Tsıfrlandyrylǵan jańa óndiris orny ónimdi arttyryp, jumystyń basym kópshiligin avtomattandyrylǵan rejımde atqarýǵa jaǵdaı jasaǵan.
«Elbasynyń jyl saıynǵy Joldaýy jańa kezeńderge nyq qadam basyp, zaman talabyna saı ómir súrýge, básekege qabiletti elderdiń qatarynan kórinýge jol ashatyn mańyzdy qujat dep bilemin. Biz sııaqty qarapaıym metallýrgter zamannyń aǵymyna saı tehnıkalardy meńgere otyryp, sapaly ónim shyǵaryp, óz eńbegimizben damýǵa úles qosýymyz kerek. Metallýrgter árdaıym Elbasynyń joldaýyn qoldaıdy»,- dedi Aqtóbe ferroqorytpa zaýyty №1 balqytý tsehynyń qyzmetkeri Azamat Arslanov.
