Joldaý: Ulttyq qordan joǵary tehnologııalyq sektorǵa 1 mlrd dollar ınvestıtsııa quıylady

ASTANA. KAZINFORM – Ulttyq qordan ekonomıkanyń joǵary tehnologııalyq sektorlaryna 1 mlrd AQSh dollaryna deıin ınvestıtsııa quıylady. Bul týraly Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.

- Investıtsııalyq saıasat jáne qarjy sektoryn damytý blogy boıynsha perspektıvalyq salalardy jáne eńbek ónimdiliginiń áleýetin eskere otyryp, ınvestıtsııalardy tartý júıesin jańartý jónindegi is-qımyl jospary ázirlenetin bolady. Investorlardyń quqyqtaryn qorǵaý maqsatynda Bas prokýratýranyń Aktıvterdi qaıtarý komıteti Investorlardyń quqyqtaryn qorǵaý komıteti retinde qaıta qurylady. «Bankter týraly» zań qabyldanady. Onyń negizgi mindeti – naryqqa jańa qatysýshylardy tartý jáne bankterdiń erkin ótimdiligin aınalymǵa, atap aıtqanda, ekonomıkanyń naqty sektoryna baǵyttaýdy qamtamasyz etý, - dedi vıtse-premer.

Onyń atap ótýinshe, ekonomıkanyń joǵary tehnologııalyq sektorlaryna Ulttyq qordan 1 mlrd AQSh dollaryna deıin ınvestıtsııa quıylady. Ol úshin Ulttyq bank tıisti baǵdarlamany ázirleıdi.

- «Alataý qalasynyń erekshe mártebesi týraly» zań aıasynda basqarýdyń erekshe rejımi arqyly Alatau city-de jańa iskerlik belsendilik pen ınnovatsııalar ortalyǵy qurylady. Atalǵan qalanyń biregeı qarjylyq modeli bolady. Bul krıptoaktıvterdi paıdalana otyryp, tólem júrgizý múmkindigi bar krıpto-fıat arnalaryn engizý arqyly júzege asyrylady, - dedi Serik Jumanǵarın.

Buǵan deıin Úkimet Joldaýdy iske asyrý josparyn qabyldap, joldaǵy qaýipsizdik máselelerin pysyqtaıtynyn jazǵan edik.