Joldaý: Sátbaev ýnıversıtetinde Tehnologııalar men ınnovatsııalardy qoldaý ortalyǵy ashyldy
ASTANA. KAZINFORM — Sátbaev ýnıversıtetinde Tehnologııalar men ınnovatsııalardy qoldaý ortalyǵynyń saltanatty ashylýy ótti. Bul týraly Ǵylym jáne joǵary bilim mınıstrligi málim etti.
Іs-shara QR Prezıdenti Qasym-Jomart Toqaevtyń Qazaqstan halqyna Joldaýynda aıtylǵan ǵylym men ınnovatsııany ekonomıkanyń basty qozǵaýshy kúshine aınaldyrý, zııatkerlik menshik júıesin jetildirý jáne tehnologııalardy naryqqa tıimdi shyǵarý jónindegi tapsyrmalaryn júzege asyrý aıasynda ótti.
Atalǵan ortalyq – ǵylymı ázirlemeler men tehnologııalardy qorǵaý jáne olardy naryqqa engizýge qoldaý kórsetý baǵytynda mańyzdy qadam. Ortalyqtyń negizgi mindetteri – zııatkerlik menshik nysandaryn tirkeý jáne quqyqtyq qorǵaý, ınnovatsııalyq jobalardy ilgeriletý, sondaı-aq startap-komandalar men jas ǵalymdarǵa keshendi qoldaý kórsetý.
Jańa ortalyqtyń ashylýy ýnıversıtettiń ǵylymı-ınnovatsııalyq ekojúıesin odan ári damytýǵa serpin berip, ónertabystar men jańa tehnologııalardy naqty ekonomıka sektoryna engizýge jol ashady. Munda ǵalymdar men zertteýshiler óz jobalaryn quqyqtyq turǵyda qorǵap qana qoımaı, olardy kommertsııalandyrý múmkindigine de ıe bolady.
– Ortalyqtyń basty maqsaty – ınnovatsııalarǵa qolaıly orta qalyptastyrý, perspektıvaly ıdeıalardy erte kezeńde anyqtaý, zııatkerlik menshik mádenıetin damytý jáne ýnıversıtet, bıznes pen memlekettik sektor arasyndaǵy baılanysty nyǵaıtý, – dedi Sátbaev ýnıversıtetiniń rektory Meıram Begentaev.
Tarıhı kontekstte bul bastama – ýnıversıtet úshin jańa belestiń biri. Sátbaev ýnıversıtetinde (burynǵy Qazaq polıtehnıkalyq ınstıtýty) alǵashqy patenttik qyzmet 1966 jyly ashylyp, 1967 jyly alǵashqy patent alynǵan. Osy salada ýnıversıtet tarıhynda rekord ornatqan – Galına Boıko, onyń enshisinde 63 ónertabys tirkelgen.
Ortalyqtyń ashylýy – Sátbaev ýnıversıtetiniń eldegi jetekshi ǵylymı-zertteý jáne ınnovatsııalyq hab retindegi rólin odan ári nyǵaıtatyn strategııalyq bastama. Aldaǵy ýaqytta bul ortalyq otandyq ǵylymnyń damýyna, sondaı-aq ınnovatsııalyq kásipkerliktiń jandanýyna eleýli úles qospaq. Bolashaqta ortalyq otandyq ǵylymnyń damýyna, sondaı-aq ınnovatsııalyq kásipkerlikti jandandyrýǵa eleýli úles qosatynyna senim mol.