Joldaý: «Samuryq-Qazyna» 1,3 trıllıon teńgeniń 18 ınvestıtsııalyq jobasyn júzege asyrdy

NUR-SULTAN. QazAqparat – Prezıdenttiń baspasóz hatshysy Berik Ýálı Memleket basshysynyń Qazaqstan halqyna Joldaýynda aıtylǵan ınvestıtsııa tartý týraly tapsyrmanyń qalaı oryndalǵany týraly jelidegi paraqshasynda jazdy, dep habarlaıdy QazAqparat.

Berik Ýálı 2020 jylǵy 1 qyrkúıekte jarııalanǵan Memleket basshysy Qasym-Jomart Toqaevtyń «Jańa jaǵdaıdaǵy Qazaqstan: is-qımyl kezeńi» atty Joldaýyna aıtylǵan mindetten úzindi keltirdi.

«Álemde qalyptasqan jańa ahýalda elge ınvestıtsııa tartyp, otandyq taýarlar men qyzmetterdi eksportqa shyǵarý Úkimet úshin erekshe basymdyqqa ıe bolyp otyr», delingen Prezıdent Joldaýynda.

Atalmysh tapsyrma boıynsha «Samuryq-Qazyna» UÁQ» aktsıonerlik qoǵamy quny 1,3 trıllıon teńge bolatyn 18 ınvestıtsııalyq jobany júzege asyryp, 13 myńnan astam jumys orny ashylǵan.

«Atap aıtqanda:

- Qostanaı oblysynyń eldi mekenderin gazdandyrýdy keńeıtý;

- Qýaty 500 kV bolatyn Shúlbi sý elektr stantsııasy – Aqtoǵaı – Taldyqorǵan – Alma jelisiniń qurylysy;

- Atyraý munaı óńdeý zaýytyndaǵy munaıdy joǵary deńgeıde qaıta óńdeý keshenin salý;

- Taraz qalasynda gaz taratý jelilerin jańǵyrtý;

- Mańǵystaý oblysynda gaz taratý jelilerin jańǵyrtý, rekonstrýktsııalaý jáne salý;

- Shardara sý elektr stantsııasyn jańǵyrtý;

- Prorva ken oryndary tobynyń ilespe munaı gazyn kúkirtsizdendirý qondyrǵysyn salý;

- «Beıneý – Bozoı – Shymkent» magıstraldy gaz qubyrynda 4 kompressorlyq stantsııa salý», delingen habarlamada.