Joldaý mindetteri: Jańa qus fabrıkasy eksportty arttyrýǵa kúsh salmaq

KÓKShETAÝ. QazAqparat - Memleket basshysy Nursultan Nazarbaevtyń qazan aıyndaǵy Joldaýynda eńbek ónimdiligin ulǵaıtý jáne qaıta óńdelgen aýyl sharýashylyǵy óniminiń eksportyn 2022 jylǵa qaraı 2,5 ese arttyrý tapsyrmasyn bergen bolatyn. Osy oraıda, Aqmola oblysyndaǵy Makınsk qus fabrıkasy qus etiniń eksporttyq áleýetin arttyryp, ishki naryqtaǵy suranysty qanaǵattandyrýǵa septigin tıgizbek, dep habarlaıdy QazAqparat tilshisi.

Bulandy aýdanynda ashylǵan «Makınsk qus fabrıkasy» JShS jylyna 50 myń tonna qus etin óndirýge qaýqarly. Bul - qýattylyǵy, tehnıkalyq jabdyqtalýy jáne ınvestorlardyń quramy jaǵynan biregeı joba. Investorlar qatarynda «Aitas KZ» AQ, Eýropa qaıta qurý jáne damý banki, Baiterek Venture Fund venchýrlyq qory bar, al kredıtory - «Qazaqstan damý banki» AQ.

Fabrıkanyń birinshi kezeńi toǵyz óndiristik alańdy qamtıdy. Olar -  árqaısysynda on eki qus qorasy bar tórt broılerlik ınkýbator, qus etin óńdeý zaýyty, qaldyqtardy qordalandyrý jelisi, qosalqy alań, jemshóp óńdeý tsehy. Fabrıka ashylǵan boıda ınkýbatorlarǵa alǵashqy 300 myń jumyrtqa salyndy. Birinshi kezeńniń qalǵan alańdary bıylǵy jyldyń sońyna deıin iske qosylatyn bolady. Ekinshi kezeńniń jumysy 2020 jyldyń ekinshi jartysyna mejelenip otyr.

Makınsk qus fabrıkasy taýyq etin óndirý kólemi boıynsha Ortalyq Azııa óńirinde eń iri kásiporyndardyń biri bolmaq.

Kásiporynnyń BAQ-pen baılanys jáne PR menedjeri Malıka Bóldekbaevanyń aıtýynsha, mańyzdy jobany júzege asyrý óńirde jańa jumys oryndaryn ashyp, óndiristi damytýǵa serpin beredi. Sonymen qatar, atalǵan joba Astana qalasynyń aınalasynda azyq-túlik beldeýin damytýǵa septigin tıgizbek.

Kásiporyn basshylarynyń aıtýynsha, bul, jylyna 25 myń tonna qus etin óndirý jónindegi jobanyń alǵashqy kezeńi. Fabrıka tolyq qýatyna shyqqan kezde elimizdegi qus eti ımportynyń úshten bir bóligin jabady.

«Bul - qus etin óndirýdegi elimizdegi eń iri jobalardyń biri. Jobany iske qosý jergilikti óndiristiń jáne qus eti eksportynyń kólemin ulǵaıtýǵa múmkindik beredi», - deıdi Malıka Bóldekbaeva.

Kásiporyn eń aldymen, Aqmola oblysy men Astana qalasynyń saýda sórelerin sapaly qus etimen jáne jumyrtqamen qamtýǵa múmkindik berse, ekinshi jaǵynan Makınsk qalasyndaǵy jumyssyzdyqty joıýǵa septigin tıgizedi. Óıtkeni, qus fabrıkasy tolyq qýatyna shyqqan kezde turaqty 700 jumys orny ashylatyny josparlanǵan. Oǵan qosa, Bulandy aýdanynyń qýat kózderimen jáne sýmen jabdyqtalý júıesin nyǵaıtady, sondaı-aq óńirdegi shaǵyn jáne orta bıznestiń damýyna oń yqpal etedi.

Sonymen qatar, Malıka Bóldekbaeva strategııalyq josparda 2023 jyly 100 myń  tonna qus etin óndiretin Makınsk qus fabrıkasynyń ІІІ kezeńin iske qosý kózdelgenin aıtty.

Bul maqsatta qosymsha 100 mıllıon dollar ınvestıtsııa salý kózdelgen. Oǵan qosa, orta merzimdi perspektıvada kompanııa ІPO-ǵa shyǵý múmkindigin qarastyryp otyr. Jalpy , fabrıka Aqmola, Soltústik Qazaqstan, Qostanaı jáne Qaraǵandy oblystarynyń naryqtaryna baǵdarlanǵan.

 

«Eń aldymen, Astana men Qaraǵandy qalalaryna óndiriletin taýyq etiniń 60 paıyzyna deıin ótkizý josparda bar», - dep túıindedi Malıka Bóldekbaeva.

Makınsk qus fabrıkasy «Qazaqstannyń básekege qabiletti kóshbasshylary - ulttyq jeńimpazdary» atty 30 óndiristiń quramyna engen Óskemen qus fabrıkasynyń óndirisin jalǵastyryp otyr. Et ónimderin óńdeý boıynsha keshenniń tolyq qýatyna shyǵýy Memleket basshysy Nursultan Nazarbaev  usynǵan «100 naqty qadam» Ult jospary men «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda aıtylǵan mindetterdi júzege asyrýdyń mańyzdy kezeńine aınalatyny sózsiz.

Aıta keteıik, Elbasy sońǵy Joldaýynda agroónerkásiptik keshenniń bar áleýetin júzege asyrý kerektigin qadap aıtqan bolatyn. Ondaǵy negizgi mindet - eńbek ónimdiligin ulǵaıtý, 2022 jylǵa qaraı óńdelgen aýyl sharýashylyǵy ónimderiniń eksportyn 2,5 esege arttyrý.