Joldaý mindetteri: Oral mektepteri «Bestik odaq» qurdy

ORAL. QazAqparat  - Oral qalasyndaǵy fızıka-matematıkalyq baǵyttaǵy Nazarbaev zııatkerlik mektebi men óńirdegi daryndy balalarǵa arnalǵan mektepter arasynda «Bestik odaq» memorandýmyna qol qoıyldy, dep habarlaıdy QazAqparat tilshisi.

Nazarbaev zııatkerlik mektebiniń dırektory Tımýr Nurkeshovtiń aıtýynsha, jańadan qurylǵan odaq Elbasy Joldaýynda aıtylǵan mindetterdi júzege asyrýdy kózdeıdi.

Odaq músheleri qatarynda daryndy balalarǵa arnalǵan mamandandyrylǵan S.Seıfýllın atyndaǵy №11 oblystyq qazaq mektep-ınternat kesheni, Oral qalasyndaǵy daryndy balalarǵa arnalǵan mamandandyrylǵan №8 oblystyq mektebi, Batys Qazaqstan oblysynyń daryndy balalarǵa arnalǵan mamandandyrylǵan «Bilim-ınnovatsııa» mektep-lıtseı-ınternaty, Batys Qazaqstan oblystyq daryndy balalarǵa arnalǵan mamandandyrylǵan aqparattyq tehnologııalar mektep-lıtseı-ınternaty bar.

Memleket basshysy Qazaqstan halqyna arnaǵan Joldaýynda zııatkerlik mektepterdiń oqytý júıesi men ádistemesi memlekettik mektepter úshin biryńǵaı standart bolýy tıis ekenin aıtqan bolatyn.

T.Nurkeshovtiń sózine qaraǵanda, osy oraıda óńirde zııatkerlik mektep tájirıbesin taratý jumystary júıeli júrgizilip keledi. Oblys mektepteri muǵalimderine arnalǵan semınarlar, dırektorlardyń taǵylymdamasy, kitaphana, psıholog mamandarǵa ótkiziletin sheberlik saǵattary osyǵan dálel. 2016 jyldan bastap oblys mektepteriniń 47 dırektory taǵylymdamadan ótse, aýdandarda 7 kóshpeli semınar uıymdastyryldy. Sonymen qatar zııatkerlik mektep pedagogtary júıelik-ádistemelik keshen úshin 400-den asa materıal daıyndady. 

«Jańadan qurylǵan odaq quramyndaǵy bilim ordalary zııatkerlik mektep júıesin óz mektepterine engizýde. Onyń ishinde oqytý ádisteri, áleýmettik jobalar bar. ıAǵnı, bizdiń maqsatymyz - oblysymyzdaǵy úzdik mekteptermen birlesip, zııatkerlik mektep tájirıbesin taratý jumystaryn ári qaraı júıeli, tabysty jalǵastyrý. «Bestik odaq» bes baǵytta jumys isteıtin bolady. Olardyń qatarynda oqýshylardyń akademııalyq, shyǵarmashylyq turǵydan damýyna yqpal etý, ata-analarmen birlesip jumystaný, muǵalimder men ákimshilik qyzmettegi mamandardyń kásibı damýyna járdemdesý baǵytyndaǵy is-sharalar bar», - dedi Tımýr Nurkeshov. 

Eske salaıyq, Elbasy 5 qazandaǵy Joldaýynda orta bilim júıesinde negizgi qadamdar aıqyndalǵanyn atap óte kele, Nazarbaev zııatkerlik mektepteriniń oqytý ádisi men júıesi memlekettik mektepter úshin biryńǵaı standart bolýy tıistigin aıtty.