Joldaý mindetteri: Ómirdiń uzarýyna medıtsınalyq qyzmet sapasy yqpalyn tıgizedi - senator

KÓKShETAÝ. QazAqparat - QR Prezıdenti Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyndaǵy mindetterdi halyqqa túsindirý maqsatynda Aqmola oblysyna jumys saparymen kelgen Qazaqstan Respýblıkasy Parlamenti Senatynyń depýtaty Dáýren Ádilbekov Kókshetaý qalalyq emhanasynyń ujymymen kezdesti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Kezdesýde senator Joldaýda belgilengen mindetter men elimizdiń damý baǵdary jaıynda jan-jaqty aıtyp berdi.

Qazirgi kúni qazaqstandyqtardyń sany 18 mıllıonnan asyp, ómir súrý uzaqtyǵy 72,5 jasqa jetken.

«Adamdardyń ómir súrý jasynyń uzarýyna medıtsınalyq qyzmet sapasynyń artýy ıgi yqpalyn tıgizip otyrǵany anyq», deıdi senator Dáýren Ádilbekov.

Joldaýda densaýlyq saqtaý salasyn damytýǵa jete kóńil bólinip otyr. Aldaǵy ýaqytta bilim jáne densaýlyq saqtaý salalaryna bólinetin qarjy jalpy ishki ónimniń 10 paıyzyn quraıtyn bolady. Munyń ózi densaýlyq saqtaý salasyn zaman talabyna saı qaıta qurýǵa oń áserin tıgizbek.

Sonymen birge, Joldaýda jańa jyldan bastap eń tómengi jalaqy kólemi 1,5 esege óspek. Osyǵan oraı, medıtsına qyzmetkerleriniń de eńbekaqy kólemi ósetin bolady.

 

Senator Joldaýda qamtylǵan mindetterdi oryndaýǵa barsha qazaqstandyqtar belsene atsalysýy qajettigin aıta kele, elimizdiń damýyna eleýli áser etetin bul mindetterdi júzege asyrý bolashaqtaǵy álemniń ozyq 30 eliniń sanatyna qosylý jónindegi perspektıvalyq maqsatqa qol jetkizýge ıgi yqpalyn tıgizetindigin atap ótti.