Joldaý: Memlekettik basqarý akademııasy «Jańa formatsııanyń basshysy» baǵdarlamasyn ázirleýge kiristi
Elbasynyń jańa Joldaýynda qazaqstandyqtardyń ál-aýqatynyń ósýi basty basymdyqqa aınalýǵa tıistigi kórsetilgen. Memlekettiń tabysqa jetýiniń kepili eldiń basty baılyǵy - adamnyń damý máselesi bolyp otyr.
Osy atalǵan máseleni keńinen talqylaý maqsatynda «Qazaqstandyqtardyń ál-aýqatynyń ósýi: qoǵamdyq kelisimdi nyǵaıtýdyń negizi» atty QR Prezıdentiniń janyndaǵy Memlekettik basqarý akademııasynyń Aqparattyq-resýrstyq ortalyǵynda ǵylymı sarapshylyq keńesiniń otyrysy ótti.
Otyrys jumysyna ekonomıka, qoǵam, áleýmettaný salalary boıynsha sarapshy mamandar qatysyp, Joldaýda aıtylǵan Jalpyǵa ortaq eńbek qoǵamyn qurý men tabysty elge aınalýdyń alǵysharttary men negizderi máselesi sóz boldy.
«Elbasy Joldaýyn júzege asyrýda akademııanyń aldynda kóptegen mindetter tur, atap aıtqanda Joldaý memlekettik basqarý jáne oryndaýshy organdar arqyly júzege asyrylatyn bolǵandyqtan, memlekettik basqarýdyń negizgi strategııasy men tabysty tájirıbesi týraly naqty túsinik berý, basym jáne damý maqsattaryn anyqtaýymyz kerek. Qazaqstan úshin memlekettik organdardyń, sarapshylar qaýymdastyǵynyń, úkimettik emes uıymdardyń óz aldyna qoıylǵan mindetterin iske asyrýda nyǵaıtý qajet», - dedi QR Prezıdentiniń janyndaǵy Memlekettik basqarý akademııasynyń vıtse-rektory Aıgúl Kósherbaeva
Sonymen qatar, vıtse-rektor Memlekettik basqarý akademııasynyń Nazarbaev Ýnıversıtetimen birlesip Elbasy Joldaýynda aıtylǵan «Jańa formatsııanyń basshysy» baǵdarlamasyn jáne basshylyq qyzmetterge taǵaıyndaý kezinde arnaıy qaıta daıarlaýdan ótkizetin kýrstar ázirleý jumystaryna kirisip ketkenin de tilge tıek etti.
Prezıdent óz Joldaýynda úzdik sheteldik kompanııalarda jumys tájirıbesi bar nemese álemniń jetekshi ýnıversıtetterinde bilim alǵan jeke sektordaǵy kásibı mamandardy tartý mańyzdy ekenin aıtyp ótken bolatyn.
«Joldaýdyń qabyldanýy men onyń oryndalýy arasynda kóptegen protsester bar, atap aıtqanda halyqqa jetkize bilý men tapsyrmany oryndaýda neden bastaý kerektigin túsinip alý. Sondyqtan ekonomıka, qoǵam, áleýmettaný ǵylymdary boıynsha ǵylymı sarapshylardyń keńestik otyrysyn uıymdastyryp, talqylaýdamyz. Bizdiń maqsat - ǵylymı turǵyda talqydan ótkizip ony tıisti aýdıtorııaǵa usynys túrinde jetkizý», - dedi QR Prezıdentiniń janyndaǵy Memlekettik basqarý akademııasynyń etnosaralyq jáne konfessııaaralyq qatynastardy zertteý ortalyǵynyń jetekshisi, sarapshy maman Aıgúl Sádýaqasova.
Uıymdastyrýshylardyń aıtýynsha jıyn barysynda aıtylǵan sarapshylardyń pikirleri men usynystary jınaqtalyp Joldaýdyń júzege asyrý barysynda eskeriletin bolady.
Eske sala ketsek, Elbasynyń 5 qazandaǵy halyqqa Joldaýynda Memlekettik basqarý akademııasy Nazarbaev Ýnıversıtetimen birlesip, «Jańa formatsııanyń basshysy» baǵdarlamasyn jáne basshylyq qyzmetterge taǵaıyndaý kezinde arnaıy qaıta daıarlaýdan ótkizetin kýrstar ázirleý qajettiligi aıtylǵan bolatyn.
