Joldaý: «Made in Kazakhstan» brendimen ekologııalyq taza ónimderdiń eksportyna kóshý qajet
ASTANA. QazAqparat - Agrarlyq sektor ekonomıkanyń jańa draıverine aınalýy kerek.
Bul jóninde Elbasy Nursultan Nazarbaev el halqyna arnaǵan jyl saıynǵy Joldaýynda aıtty, dep habarlaıdy QazAqparat.
Prezıdent Qazaqstannyń agroónerkásip kesheniniń bolashaǵy zor ekendigin aıta kele, elimiz kóptegen pozıtsııalar boıynsha álemdegi iri agrarlyq eksporttyq ónim óndirýshilerdiń birine aınala alatynyn atap ótti.
«Bul, ásirese, ekologııalyq taza taǵamdarǵa qatysty. «Made in Kazakhstan» brendi sondaı ónimderdiń etalony bolýǵa tıis.
Sonymen qatar, astyq ónimderi boıynsha biz Eýrazııada «nan kárzeńkesi» bolýymyz kerek. Shıkizat óndirisinen sapaly óńdelgen ónim shyǵarýǵa kóshý qajet. Tek sonda ǵana biz halyqaralyq naryqtarda básekege qabiletti bola alamyz.
Osy maqsattarǵa qol jetkizý úshin Úkimet pen ákimderge mynadaı tapsyrmalar beremin:
birinshiden, sýbsıdııalardy bólý qaǵıdalaryn qaıta qarastyryp, birtindep ónimdi saqtandyrýǵa kóshý qajet;
ekinshiden, bes jyl ishinde 500 myńnan astam jeke úı sharýashylyqtary men shaǵyn fermerlerdi kooperatıvterge tartýǵa múmkindik beretin jaǵdaı jasaý kerek;
úshinshiden, ónimniń óńdeý sapasyn jaqsartyp, taýarlardy saqtaýdyń, tasymaldaýdyń jáne ótkizýdiń tıimdi júıesin qurý qajet;
tórtinshiden, eńbek ónimdiligin belsendi túrde arttyryp, óndiris shyǵyndaryn tómendetý kerek;
besinshiden, jerdi paıdalaný tıimdiligin arttyrýǵa tıispiz. Sýarmaly egis alańyn 5 jyl ishinde 40%-ǵa keńeıtip, 2 mıllıon gektarǵa jetkizý qajet;
altynshydan, óndiriste suranysqa ıe agrarlyq ǵylymı zertteýlerge salynatyn ınvestıtsııa kólemin arttyrý kerek», - dep naqtylady Memleket basshysy.
Sondaı-aq N.Nazarbaev aýyl sharýashylyǵyn ártaraptandyryp, 2021 jylǵa qaraı azyq-túlik taýary eksportyn 40%-ǵa kóbeıtýdi tapsyrdy.
Bul mindetter agroónerkásip keshenin damytýdyń jańa memlekettik baǵdarlamasy aıasynda iske asyrylýy qajet.
