Joldaý: Qazaqstanda «Nazarbaev Ýnıversıtet» sekildi taǵy bir irgeli JOO ashylady
«Joǵary bilim salasynda oqý oryndaryna talaptar qataıa túsedi. Granttardyń sanyn ósirdik. Endigi kezekte jaýapkershilikti arttyratyn ýaqyt keldi. JOO-nyń tabystylyǵynyń basty talaby - oqý bitkennen keıin stýdentterdiń jumyspen qamtylýy, olardyń joǵary aılyǵy bar jumysqa ornalasýy bolmaq. Ýnıversıtetti bitirgennen keıin - túlekterdiń hali ne boldy, olardy aılyǵy jaqsy jumysqa qabyldady ma? Solaı bolsa, demek, ýnıversıtet myqty degen sóz. Olaı bolmasa, bul ýnıversıtettiń ómirsheńdigi de joq. Ol ýnıversıtet balalardyń túspeıtinin bilýi tıis», - dedi Prezıdent.
Memleket basshysy óz Joldaýynda Bilim jáne ǵylym mınıstrimen sóıleskenin aıtyp ótti.
«Osy jyly barlyq ýnıversıtetter túlekterdi shyǵardy. Qaı ýnıversıtetten qanshasy jumysqa ornalasa aldy? Ol týraly jarııaly túrde aıtyp, baspaǵa jarııalap, televıdenıeden de kórsetý kerek. Mine, sondyqtan JOO-lardy irilendirý saıasatyn júrgizý kerek. Bizdiń elde 130-dan astam ýnıversıtet bar. Shyny kerek, olardyń sany buryn 200-ge jýyq edi. Álbette, JOO-larǵa qarsy emespin, kimniń qaıda oqysy kelse, sonda oqysyn. Biraq, eshkimge qajet bolmaı qalatyn adamdardy daıyndaýdyń, jaı dıplom bere salýdyń keregi ne?» - dedi Memleket basshysy.
Nursultan Nazarbaev dál osy jerde sybaılas jemqorlyqtyń da qylań beretinin eske saldy.
«Naryqta tek joǵary bilim bere alatyn JOO-lar qalýy kerek. Jahandyq ýnıversıtettermen yntymaqtastyqty jalǵastyryp, Nazarbaev Ýnıversıtettiń tájirıbesi boıynsha álemniń úzdik top-menedjerlerin tartý kerek. Álbette, "Nazarbaev Ýnıversıtetke" qomaqty qarajat bólinip jatyr deýi de múmkin. Biraq, basqa ýnıversıtetter - Almatydaǵy Ekonomıka jáne saýda ýnıversıteti me edi - tartyp jatyr ǵoı. Olar da sátti jumys isteýde. QazMÝ-da solaı sátti jumys babynda. Qazirgi bilim berý ınfraqurylymynyń bazasy negizinde "Nazarbaev Ýnıversıtettiń" úlgisi boıynsha taǵy bir aımaqtyq JOO ashý kerek dep esepteımin», - dedi Prezıdent.
