Joldaý Qazaqstan men Ózbekstan baılanysyn nyǵaıtýǵa jol ashady – sarapshy
ASTANA. KAZINFORM — Qazaqstan Prezıdenti Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Joldaýy aldaǵy aýqymdy ózgeristerdiń baǵytyn aıqyndaǵan mańyzdy saıası oqıǵa boldy. Mundaı pikirdi Ózbekstan Respýblıkasy Prezıdenti janyndaǵy Strategııalyq jáne óńiraralyq zertteýler ınstıtýty dırektorynyń birinshi orynbasary Akramjon Nematov Kazinform agenttigine bergen suhbatynda aıtty.
Akramjon Nematovtyń pikirinshe, Joldaýda Qazaqstan damýynyń jańa kezeńine qatysty negizgi basymdyqtar aıqyndalǵan. Atap aıtqanda, ekonomıkany tehnologııalyq turǵydan jańǵyrtý, ınfraqurylymdy keńinen jańartý, adamı kapıtaldy damytý jáne halyqtyń ál-aýqatyn arttyrý máselelerine basymdyq berilgen.
Onyń sózinshe, Joldaýdyń basty ereksheligi – saıası jańǵyrý bastamalarynyń ekonomıkalyq jáne áleýmettik ózgeristerdi qamtıtyn uzaq merzimdi baǵdarlamaǵa ulasýynda. Bul baǵdarlama tehnologııalyq báseke men álemdik ekonomıkadaǵy qurylymdyq ózgeristerge saı keletin jańa damý modelin qalyptastyrýdy kózdeıdi.
– Eldi jańǵyrtýǵa qatysty keshendi ustanym erekshe nazar aýdartady. Infraqurylym, energetıka, kólik, ónerkásip jáne tsıfrlyq tehnologııalar jeke-jeke baǵyttar emes, ekonomıkalyq ósýdiń birtutas júıesin quraıtyn ózara baılanysty salalar retinde qarastyrylǵan. Bul rette ózgeristerdiń nátıjesi, eń aldymen, adamdardyń kúndelikti turmysynda qandaı oń ózgeris ákelgenimen ólshenedi, – dedi Akramjon Nematov.
Sarapshy aldaǵy ózgeristerdiń aýqymy olardy iske asyrýǵa arnalǵan naqty merzimderden de kórinetinin aıtty. Máselen, 2027 jyldy Halyqtyq jappaı qurylys jyly dep jarııalaý, 2029 jyldyń sońyna deıin ınfraqurylymdy túbegeıli jańartý jáne 2027 jylǵy 1 maýsymǵa deıin memlekettik basqarý júıesin reformalaýdyń keshendi josparyn ázirleý kózdelip otyr.
Onyń aıtýynsha, bul strategııalyq maqsattardyń naqty merzimdermen bekitilip, olardy júzege asyrýdyń tıisti tetikteri aıqyndalǵanyn kórsetedi.
Budan bólek Akramjon Nematov Qazaqstan men Ózbekstannyń jańǵyrý jolyndaǵy maqsat-mindetteri ózara úndes ekenin aıtyp, ekijaqty yntymaqtastyqty odan ári damytýǵa serpin beretin bes basym baǵytty atady. Olar: ónerkásiptik kooperatsııa men ınvestıtsııalyq áriptestikti keńeıtý, kólik-logıstıka baılanysyn nyǵaıtý, tsıfrlyq jáne tehnologııalyq jańǵyrýdy jedeldetý, sý-energetıka jáne ekologııa salalaryndaǵy yntymaqtastyqty damytý, adamı kapıtal men gýmanıtarlyq baılanystardy nyǵaıtý.
Sarapshynyń pikirinshe, osy baǵyttar boıynsha birlesken jumysty damytý eki el arasyndaǵy ekonomıkalyq baılanysty nyǵaıtyp, óńirlik óndiristiń básekege qabilettiligin arttyrýǵa jáne Ortalyq Azııanyń ornyqty damýyna negiz bolady.
– Menińshe, Qazaqstan men Ózbekstannyń jańǵyrý baǵdarlamalaryn ushtastyrýdyń strategııalyq mańyzy ekijaqty yntymaqtastyq sheńberinen áldeqaıda keń. Ekonomıkalyq, ónerkásiptik, kólik jáne adamı áleýeti zor eki el óńirlik damýdyń jańa júıesin qalyptastyrýda mańyzdy ról atqara alady. Bul memleketterimizge erekshe jaýapkershilik júkteıdi. Sondyqtan ulttyq reformalardyń qarqyny men júıeliligin saqtaýmen qatar, Ortalyq Azııany jańǵyrtýǵa ortaq jaǵdaı jasaýǵa da kúsh salýymyz kerek, – dedi ol.
Akramjon Nematov Ortalyq Azııanyń barlyq memleketi jańa múmkindikterdi birdeı paıdalana alýǵa tıis ekenin atap ótti. Onyń aıtýynsha, birlesken óndiris oryndaryn qurý, transshekaralyq ınfraqurylymdy damytý jáne tehnologııalyq tizbekterdi qalyptastyrý barysynda ár eldiń múddesi men básekelestik artyqshylyqtary eskerilýi qajet.
– Qazir Ortalyq Azııa elderiniń resýrstyq, óndiristik, kólik jáne adamı áleýeti, ekonomıkalarynyń ózara tolyqtyǵy men yntymaqtastyq tájirıbesi óńirdiń álemdik ekonomıkadaǵy ornyn nyǵaıtýǵa jol ashyp otyr. Bul múmkindikti der kezinde paıdalanyp, jahandyq óndiristik-logıstıkalyq tizbekterdegi ornymyzdy nyǵaıtý, óz óndirisimiz ben tehnologııalyq múmkindikterimizdi damytý, óńirlik naryqtardy keńeıtý mańyzdy. Sonda Ortalyq Azııa elderi álemdik ekonomıkadaǵy úlesin arttyryp qana qoımaı, odan ár memleketke tıetin paıdany da kóbeıte alady, – dep túıindedi ol.
Buǵan deıin Bakýde Qazaqstan Prezıdentiniń Joldaýy talqylanǵany habarlanǵan bolatyn.
